Յոլյանը Սահմանադրության պահանջների խախտմամբ է զբաղեցնում իր պաշտոնը. Արամ Մամիկոնյանի բաց նամակը՝ Ա.Միրզոյանին

ՀՀ հաշվեքննիչ պալատի Իրավաբանական վարչության պետ Արամ Մամիկոնյանն իր ֆեյսբուքյան էջում գրել է.

«Լևոն Յոլյանը Սահմանադրության պահանջների խախտմամբ է զբաղեցնում Հաշվեքննիչ պալատի նախագահի պաշտոնը:

Բաց նամակ ՀՀ Ազգային ժողովի նախագահ պարոն Արարատ Միրզոյանին

Մեծարգո պարոն Միրզոյան

Լևոն Յոլյանը 2017 թվականի փետրվարի 28-ին ՀՀ Ազգային ժողովի ԱԺՈ-222-Ա որոշմամբ նշանակվել է Վերահսկիչ պալատի նախագահ: Այնուհետև, Սահմանադրությունում փոփոխություններ կատարելուց և «Հաշվեքննիչ պալատի մասին» ՀՀ օրենքն ուժի մեջ մտնելուց հետո, 2018 թվականի ապրիլի 9-ին Վերահսկիչ պալատը դարձել է Հաշվեքննիչ պալատ:

Սահմանադրության փոփոխությունների 220-րդ հոդվածը սահմանում է, որ Վերահսկիչ պալատի անդամները շարունակում են պաշտոնավարել որպես Հաշվեքննիչ պալատի անդամներ: «Նորմատիվ իրավական ակտերի մասին» ՀՀ օրենքի 41-րդ հոդվածի 1-ին մասի համաձայն, նորմատիվ իրավական ակտի նորմը մեկնաբանվում է` ելնելով դրանում պարունակվող բառերի և արտահայտությունների տառացի նշանակությունից: Իսկ Լևոն Յոլյանը, ի տարբերություն Հաշվեքննիչ պալատի ներկայիս որոշ անդամների, անհատական իրավական ակտով նշանակված է եղել ոչ թե որպես Վերահսկիչ պալատի կամ վերջինիս խորհրդի անդամ, այլ՝ որպես Վերահսկիչ պալատի նախագահ: Ակնհայտ է, որ վերոհիշյալ իրավակարգավորումները որևէ կերպ վերաբերելի չեն Վերահսկիչ պալատի նախագահ ընտրված պաշտոնատարի կողմից նորաստեղծ մարմին հանդիսացող Հաշվեքննիչ պալատի նախագահի պաշտոնում գործունեությունը շարունակելուն:

Ավելին, Վերահսկիչ պալատի Հաշվեքննիչ պալատ դառնալուց հետո, Ազգային ժողովում, իրավական առումով, պետք է տեղի ունենար Հաշվեքննիչ պալատի նախագահի ընտրություն՝ «Հաշվեքննիչ պալատի մասին» ՀՀ օրենքի մասնավորապես 17-րդ հոդվածի և «Ազգային ժողովի կանոնակարգ» ՀՀ սահմանադրական օրենքի իմպերատիվ պահանջներին համապատասխան: Վերոգրյալ հանգամանքներից ելնելով` խնդրում եմ Ձեզ նշվածի առնչությամբ ձեռնարկել համապատասխան միջոցներ:

Հավելեմ, որ ես պատրաստվում եմ այս հարցով սահմանաված կարգով դիմել նաև դատարան, ինչից հետո հանդես կգամ լրացուցիչ մասնագիտական պարզաբանումներով…»: