«Էս մարդը խաբումա ձեզ, ձերբակալեք էս չինովնիկին». Հրանտ Բագրատյան

«Էս մարդը խաբումա ձեզ, ձերբակալեք էս չինովնիկին»: Ազգային ժողովի արտահերթ նիստում ՀՀ 2016-2018 թվականների պետական վիճակագրական աշխատանքների եռամյա ծրագիրը հաստատելու մասին նախագծի քննարկման ժամանակ հայտարարեց «Հայ ազգային կոնգրես» խմբակցության պատգամավոր Հրանտ Բագրատյանը` անդրադառնալով Ազգային վիճակագրական ծառայության պետ Ստեփան Մնացականյանի ելույթին:

Ըստ պատգամավորի՝ ԱՎԾ-ն պարբերաբար աճի տեմպ է ցույց տվել իր զեկույցներով. «Այսինքն  ՀՆԱ-ն էլի ղռռռ…իջացրել ա կոմունիստների ժամանակվա ՀՆԱ»-ն: Էս մարդը խաղեր ա տալիս տեմպերի հետ», -ասաց Բագրատյանը իր խոսքն ուղղելով Ստեփան Մնացականյանին։

«Հլը սրա արածները նայեք, ուրեմն ես երկու նամակ եմ գրում, հասցեները տարբեր, մեկը ԱՎԾ, մյուսը՝ ՀԲ, ՀԲ-ն ասում ա՝ էդ հիմարության պատճառը ՀՀ ԱՎԾ-ն ա, սա ասում ա՝ ՀԲ-ն ա պատճառը, բա սենց վիճակագրություն կլինի՞, բա սենց բան են անո՞ւմ,- չէր հանգստանում Բագրատյանը,-Ինքը հիմա կհելնի, կբացատրի, անեկդոտներ կասի, բավականաչափ էլ խելոք ա վարպետորեն խաբելու համար»:
Անդրադառնալով գյուղատնտեսության տվյալներին նա ասաց, որ ընդհանուր գյուղմթերքների ծավալը 5 միլիոն տոննա է. «դա 5 միլիարդ կգ է, բաժանեք 2 միլիոն 800.000 մարդու,եթե հավատանք իրա ասած թվերին` մենք մարդա ամեն օր ուտում ենք 4,6 կգ մթերք, թե չէ պտի թափենք, էսա կհելնի, կասի՝ էքսպորտ կա, բա սենց մարդուն պահո՞ւմ են: Էլ  կոռուպցիան ո՞նց եք ուզում լինի, կոռուպցիան ոտո՞վ ա լինում, շո՞րա հագած  լինում, էս աշխատանքը ծաղր ա, ու մենք մի բան էլ հաստատում ենք. ազատեք պետությունը նման «մասնագետներից»,-ասաց նա:

««Այո և ոչ»–ի շրջայցը շատ ոգևորիչ է, բայց դա իրավունք չի վերապահում որևէ մեկին, որպեսզի վարկաբեկի ինչ-որ մեկին»: Հրանտ Բագրատյանի ելույթին արձագանքեց ԱԺ նախագահ Գալուստ Սահակյանը:

«Երկու բառ ծրագրից խոսացեք, ով ինչ հեքիաթներ գիտի պատմում է…»,-ասաց ԱԺ խոսնակը: