ԿԳՄՍՆ-ն խտրական մոտեցում է ցուցաբերում Գալոյանի գիտական աշխատանքներում բացահայտված արտագրությունների դեպքերին. ՀՊՏՀ ուսանողների բաց նամակը՝ վարչապետին

Հայաստանի պետական տնտեսագիտական համալսարանի մի խումբ ուսանողներ ու շրջանավարտներ բաց նամակ են հղել վարչապետ Նիկոլ Փաշինյանին՝ ներկայացնելով ՀՊՏՀ ռեկտորի պաշտոնակատար Դիանա Գալոյանի գիտական աշխատանում արտագրության դեպքերը: Նամակն ու արտագրության վերաբերյալ նկարները ներկայացնում ենք ստորև.

Հարգելի՛ պարոն Փաշինյան,

Ուսումնասիրելով ՀՊՏՀ ռեկտորի պաշտոնակատար Դ. Գալոյանի գիտական աշխատանքները՝ բացահայտել ենք ակնհայտ արտագրության տասնյակ դեպքեր։ Սրանք բոլոր այն գիտական աշխատանքներն են, որոնցում, ըստ Դ. Գալոյանի ասենախոսության սեղմագրի, «հրապարակվել են ատենախոսության հիմնական դրույթները», ինչպես նաև մյուսները ներկայացվել են պրոֆեսորի գիտական կոչում ստանալու համար: Ընդ որում, եթե Ռ. Հայրապետյանի աշխատանքի թարգմանված որոշ հատվածներում բացակայում էին հղումները, ապա այս դեպքում գործ ունենք կատարված «copy paste»-երի հետ՝ նույն լեզվով։ Մենք որևէ կերպ չենք ուզում վնասել տիկին Գալոյանին և նրա հեղինակությանը։ Ընդհակառակը, կարծում ենք, որ նույնիսկ այս աչք ծակող արտագրությունները կուրսային աշխատանքից և այլ աղբյուրներից միայն իր մեղավորությունը չէ։

Վերջին շրջանում շատ է խոսվում այն մասին, որ Դ. Գալոյանի նշանակումը ԿԳՄՍ փոխնախարարի հովանավորչության արդյունք էր: Այս պնդումները չեն դադարում, որովհետև նախարարությունը մինչև այժմ ակնհայտ խտրական մոտեցում է ցուցաբերում և չի արձագանքում Դ. Գալոյանի գիտական աշխատանքներում բացահայտված պարզունակ արտագրությունների դեպքերին:

Քանի որ Ռուբեն Հայրապետյանի հրաժարականի պատճառը, ըստ ԿԳՄՍ նախարարի հայտարարության, նրա գիտական աշխատանքում առկա խնդիրներն էին և ակադեմիական արժեքները, պահանջում ենք Ձեր հանձնարարականը նախարարությանը՝ ներկայացնելու պաշտոնական եզրակացություն կից ներկայացվող ակնհայտ արտատպման դեպքերի վերաբերյալ:

Խնդրում ենք պաշտոնապես մեկնաբանել՝ սրանք արտագրության և ակադեմիական անազնվության դրսևորումներ են, թե ոչ: Առդիր՝ 5 էջ: Հարգանքով՝
ՀՊՏՀ ուսանողներ և շրջանավարտներ

Հավաքի կազմակերպիչ և համակարգող՝ Վահագն Անդրեյի Մելքումյան
Հավաքի կազմակերպիչ և համակարգող՝ Էլեն Արթուրի Հովհաննիսյան