Քոչարյանի կալանքի հարցը իմքայլականներին դրդում է՝ պետք է վաղը «բոլոլա» անել

ՀՀ երկրորդ նախագահ Ռոբերտ Քոչարյանի դիմումին Սահմանադրական դատարանը պատասխանեց սեպտեմբերի 4-ին։ Այս պատասխանից անցել է 12 օր, և Ազգային ժողովի նախագահ Արարատ Միրզոյանը որոշել է խոսել։

Հավանաբար, խոսելու առիթը վաղը դատավոր Աննա Դանիբեկյանի կողմից կայացվելիք վճռի՝ հնարավոր սարսափն է, որը պատել է իշխանական մեծամասնությանը։ Հենց այս սարսափն էլ հիմք է դարձել, որ օրենսդիր իշխանության ղեկավարը որոշել է իրենց բնորոշ մեթոդներով ճնշում գործադրել անկախ դատական համակարգի և Սահմանադրական դատարանի վրա։

Մի կողմ թողնենք այն հանգամանքը, որ գործադիր և օրենսդիր իշխանությունները չեն կարող ճնշել երրորդ՝ անկախ իշխանության վրա, գնահատել դատարանների կայացրած վճիռները, քննարկել բարձրագույն դատարանի կայացրած որոշումները։

Խնդիրն այն է, երբ Ազգային ժողովը Ռոբերտ Քոչարյանի գործով Սահմանադրական դատարան էր ուղարկում կարծիք, դրանում չի ներկայացրել որևէ իրավական վերլուծություն։

Խորհրդարանը չի կարողացել մասնագետների հետ քննարկել և մի խելքը գլխին կարծիք ուղարկել ՍԴ և բավարարվել է ընդամենը մի քանի օրենքի հղում անելով։

Եվ հիմա, երբ կայացվել է որոշում, խորհրդարանը, դարձյալ չունենալով մասնագիտական կարողություն իրերին իրենց անուններով կոչելու, դիրքորոշում է հայտնում:
Թե ինչ ասել է ԱԺ-ի կողմից իրենց ոչ ձեռնտու որոշումների վերաբերյալ դիրքորոշում, հանրությանը հայտնի է։

Չի բացառվում, որ ԱԺ պատգամավորները վաղը առավոտյան միանան «Հայ ազգային կոնգրեսին» ու սկսեն բոլոլա անել դատարանների դռների դիմաց։

Հիշեցնենք, որ Լևոն Զուրաբյանը կոչ է արել «Հայ ազգային կոնգրեսի» անդամներին և համակիրներին, ժողովրդավարության և արդարադատության համար պայքարող բոլոր քաղաքացիներին և քաղաքական ուժերին միանալ իրավապաշտպանների ակցիային և վաղը՝ Քոչարյանի խափանման միջոցի վերաբերյալ վճռի հրապարակման օրը, հավաքվել դատարանի առաջ։

Վստահաբար, Ազգային ժողովի նախագահ Արարատ Միրզոյանի հորդորած դիրքորոշումը իմքայլականները կարտահայտեն վաղն իրենց իմացած միակ ձևով։

Եվ սա այդ դեպքում, երբ Ամուլսարը պայթում է իր խնդրի ուժգնությամբ, իսկ վարչապետը շարունակում է միայն ֆեյսբուքյան էջում նկարած վիճակագրություններ հրապարակել, իսկ Ջերմուկից Երևան ավտոերթի ու քայլերթի օրը, գնալ Սևան ձուկ ուտելու․․․

NEWSPRESS.am