Ինչ է ակնարկում ԵԿՄ նախագահը իր 7000-անոց ուժով

Երկրապահ կամավորների միության նախագահ Սասուն Միքայելյանն այսօր հպարտությամբ հայտարարել է՝ Աստված մի արասցե, եթե ոտնձգություն լինի, 7000 մարդ կկանգնի մեր զինվորի կողքին առաջնագծում, իսկ դա մեծ ուժ է։ Այո՛, ճիշտ է Միքայելյանը՝ 7000 հոգին մեծ ուժ է, և հնարավոր է այդ մեծ ուժն օգտագործվի այլ նպատակով։ 

Սասուն Միքայելյանը մեծ ուժի մասին խոսելուց զատ, խոսել է նաև Արթուր Վանեցյանի հետ իր ունեցած ընկերական հարաբերությունների մասին։

«Արթուր Վանեցյանն իմ ընկերն է, միասին ճանապարհ ենք անցել, իմ ընկերն էլ մնալու է»,-ասել է նա։

Սասուն Միքայելյանն ընդգծել է նաև՝ ոչ ոք սպայի ուսադիրն աղբաման նետելու մասին խոսելու իրավունք չունի։

Միքայելյանի այսօրվա պատասխաններն ուղղված են մեկ օր առաջ Փաշինյանի արած արտահայտությունների դեմ։

Այո՛, Փաշինյանը, որն անգամ զինվորական ծառայություն չի անցել, իրավունք չունի խոսել սպայի ուսադիրներից, բայց դա նրան չի խանգարել, որ ոչ միայն խոսի, այլ դրանք աղբաման հասցնի։

Այո՛, Փաշինյանը, որ կարիք ունի սթափության, առաջին հետևողը պետք է լիներ Վանեցյանի սթափության կոչին, բայց անում է ճիշտ հակառակն ու ատելության մաղձով իրար խառնում ամեն ինչ ու ամենքին՝ չխնայելով ընդամենն օրեր առաջ իր թիմում աշխատող կադրին, որն իր քչախոսությամբ շատ ավելի բարձր վարկանիշ ունի, քան նույն ինքը՝ Փաշինյանը։

Եվ հիմա, երբ օր օրի ավելանում է հասարակության դժգոհության ալիքը, երբ ամեն վայրկյան այդ նույն հասարակությունն ականատես է լինում, որ Փաշինյանը զբաղված է ոչ թե իրենց կյանքի որակը բարձրացնելով, այլ ընդամենը հանրահավաքներ կազմակերպելով՝ ընդհուպ դրա համար պետբյուջեից ծախսելով 350 հազար դոլար, սկսում է հասկանալ նրա՝ ամեն տեղ անգամ յուրայինների, եկեղեցականների շարքերում թշնամիներ ման գալու մարմաջը, չէ՞ որ Փաշինյանը կարող է պայքարել միայն իր իսկ ստեղծած թշնամիների դեմ։

Իսկ հիմա, երբ շրջանառվում են հեղաշրջման մասին լուրեր, Սասուն Միքայելյանը Նիկոլ Փաշինյանին հիշեցնում է իր ունեցած ուժի մասին, որին գուցե գումարվի Վանեցյանի ուժն ու «սևերի» ողջ բազմությունը՝ գահից գցելով այն ղեկավարին, ով այդ գահն օգտագործեց միայն ինքնահաստատվելու, պոպուլիստական արդեն կրկնվող հայտարարությունների ու մարդաորսության համար։

NEWSPRESS.am