Լսեք, քանի զենքի էջը չի բացվել

Ժիրայր Սեֆիլյանը, որը Նիկոլ Փաշինյանի հետ Կառավարության շենքում հանդիպման էր գնացել բանտում գտնվող Արմեն Բիլյանին և Սմբատ Բարսեղյանին ազատ արձակելու խնդրանքով, բավարարված չէ այդ հանդիպումից ու ստիպված է այդ մարդկանց բանտից ազատ արձակելու վրա հասարակության ուշադրությունը սևեռելու համար դիմել մամուլի ասուլիսների օգնությանը՝ իր հետ տանելով Բիլյանի և Բարսեղյանի նկարները։

Սեֆիլյանը Բիլյանի և Բարսեղյանի դատավարությունը համարում է թատրոն և մեծ թատրոն այն դեպքում, երբ երկրում տեղի է ունեցել ահաբեկչություն, ու երեք ոստիկան է սպանվել։ Սեֆիլյանի համար Փաշինյանը մնացել է նախորդների ազդեցության տակ, դրա համար էլ դատավարությունը թատրոն է, բայց, չգիտես ինչու, նույն թատրոնը չէ Ռոբերտ Քոչարյանի դատավարությունը։

Ստացվում է՝ Սեֆիլյանը բացահայտ խոսում է երկակի ստանդարտների մասին. եթե Քոչարյանին է խոսքը վերաբերում, նա կալանավորված է, ապա՝ կեցցե դատարանը, այն թատրոն Սեֆիլյանին չի հիշեցնում, իսկ եթե խոսքը վերաբերում է Արմենին ու Սմբատին, ապա այդ նույն դատարանը թատրոն է հիշեցնում։

Սեֆիլյանն ասում է, որ նոր իշխանությունը չի կարողանում իրավական գնահատականներ տալ, օրինակ՝ չի կարողանում անգամ մի «Սանիթեքի» հարց լուծել ու դա բերում է իշխանության վարկանիշի անկման, որին սպասում է Կրեմլը։

Այն, որ այս իշխանությունը չի կարողանում որևէ հարցի իրավական գնահատական տալ, և այդ մասին փաստում է «Սանիթեքն» ու այդ ընկերության շուրջ ծավալված հայտառակ զարգացումները, փաստ են։

Բայց Սեֆիլյանը սխալվում է, որ այս իշխանության թերացումներն այլ պետության վզին են փաթաթում․ իշխանությունը չի կարողանում, որովհետև ունակ ու կարողություն չունի, իսկ այստեղ շատ լուրջ մտահոգություն է առաջանում՝ բա ինչո՞ւ է իշխանության։

Թեև տկար են ու ոչ պրոֆեսիոնալ, սակայն դա, ըստ Սեֆիլյանի, չպետք է խանգարի, որ Փաշինյանը դառնա ֆաշիստ՝ իր բռի մեջ հավաքելով ամենքին ու ամեն ինչ։

Սեֆիլյանը պարզապես մոռացավ նշել, որ Փաշինյանի բուռն այլևս ունակ չէ պահել իր թևի տակ ծվարածներին, էլ ո՜ւր մնաց ամենքին ու ամեն ինչ։

Իրավիճակը երկրում վաղուց է դուրս եկել վարչապետի վերահսկողությունից, քանի որ միայն հանրահավաքներով, Ֆեյսբուքով ու բռնած մարդկանց համրելով հնարավոր չէ որևէ բան վերահսկել։

Ֆաշիստներին պատմությունն իրենց տեղն է դրել, իսկ Սեֆիլյանին հորդորում ենք ջուր չպղտորել ձկներ բռնելու համար ու կողմնորոշվել՝ զենքով հարց լուծելու էջը փակե՞լ, թե՞ կիսափակ են թողել։

NEWSPRESS.am