Հանրային ռադիոյի արխիվը կթվայնացվի շվեյցարական ժամանակակից տեխնիկայով

Հայաստանի հանրային ռադիոն և Հայաստանում Շվեյցարիայի Համադաշնության դեսպանությունը ստորագրեցին տեխնիկական համագործակցության ծրագրի ամփոփագիրը։ Այս մասին հայտնում են հանրային ռադիոյի մամուլի հետ կապերի բաժնից։

Այս ծրագիրը մեծ դեր ունեցավ հայկական երաժշտական ավանդույթի պատմական հիշողությունը պահպանելու հարցում: Ծրագրի շրջանակներում Շվեյցարիայից ժամանած մասնագետները կարգաբերեցին և վերանորոգեցին Հանրային ռադիոյի կողմից օգտագործվող շվեյցարական աշխարհահռչակ «Շտուդեռ» մակնիշի ժապավենային նվագարկիչները, որոնք օգտագործվում են ռադիոյի ֆոնդային ձայնագրությունները թվայնացնելու համար:

«Շտուդեռ» տիպի նվագարկիչները լավագույնն են աշխարհում, սակայն, քանի որ այլևս չեն արտադրվում, դրանց սպասարկումը չափազանց բարդ է: Հանրային ռադիոն ունի 6 այդպիսի նվագարկիչ, որոնցից աշխատում էր միայն 3-ը:

Շվեյցարացի մասնագետների ջանքերի շնորհիվ ներկայում 6-ն էլ կատարյալ վիճակում են, ինչի արդյունքում ժապավենային արխվի թվայնացման արտադրողականությունը կրկնապատկվել է: Կարգաբերման աշխատանքները անձամբ անցկացրել է «Շտուդեռ» գործարանի ինժեներ Յոհակիմ Յունգսթը և Յուրգ Շոպերը՝ «ՇՈՊԵՐ ԷյՋի Վինթերտուր» ընկերությունից (Schopper AG Winterthur):

Շվեյցարիայի դեսպանատան ֆինանսական աջակցությամբ այս ծրագրի իրականացումը անհնար էր պատկերացնել առանց Տկն. Սյուզան Ռիբիցկի Վարգայի մեծ նվիրատվության, ի հիշատակ իր հոր՝ մաեստրո Տիբոր Վարգայի:

Հանրային ռադիոյի ձայնադարանում այժմ պահպանվում է ավելի քան 150 հազար ժամ տևողությամբ մոտ 100 հազար հեղինակային, երաժշտական կատարում, գրական-գեղարվեստական հաղորդումներ, ռադիոբեմականացումներ։

Ֆոնդում պահպանվել են ոչ միայն հայերեն, ռուսերեն, այլ նաև քրդերեն, եզդիերեն, ադրբեջաներեն, արաբերեն ձայնագրություններ, երգ-երաժշտություն, մշակութային, մանկական հաղորդումներ, ռադիոբեմադրություններ, հայ մեծերի ելույթներ, հարցազրույցներ և արխիվային այլ նյութեր: