Հարց տալու իրավունքը դեռ արգելված չէ ՀՀ-ում. Զարուհի Փոստանջյանը՝ երկու երիտասարդին կալանավորելու մասին

Հարցեր հնչեցնելը Հայաստանում քրեորեն հետապնդելի արարք չէ: Այս մասին այսօր լրագրողների հետ հանդիպման ժամանակ նշեց «Երկիր ծիրանի» կուսակցության ղեկավար Զարուհի Փոստանջյանը:

«Ուրիշ հարց է, որ այդ հարցի հեղնակն այսօրվա գործող կառավարության առաջին դեմքն է: Ցավում եմ: Եթե դու դատավորներին անվանում ես շներ և ասում ես, որ շները տերեր են ման գալիս և վնգստում ես այստեղ-այնտեղ, դու արդեն ինքդ ես դատավորների նկատմամբ ցուցաբերում անհարգալից վերաբերմունք և սա հենց այդ համատեքստում պետք է  դիտարկենք: Իսկ հարց տալու իրավունքը դեռ արգելված չէ Հայաստանի հանրապետությունում»,- ասաց Փոստանջյանը՝ խոսելով Նարեկ Մութաֆյանի և Սարգիս Օհանջանյանի կալանավորման հարցին: 

«Երբ պետության առաջին դեմքը հայտարարում է՝ կա՞ այնպիսի մի դատավոր, որ իմ ասածին կարող է ասել՝ չէ, սա նշանակում է, որ կառավարության ներկայացուցիչը կարող է դատավորներին հրապարակավ ցուցումներ տալ: Մենք լսել ենք նաև հեռախոսազանգերը, որտեղ նույնպես կա այսպիսի ձևակերպում՝ դատավորին ասել ենք՝ ուզես-չուզես կալանքը պետք է տաս: Սա միջամտություն է դատական գործունեության նկատմամբ»,- ասաց բանախոսը: 

Փոստանջյանն անդրադարձավ նաև Սահմանադրական դատարանի դատավորների շուրջ ծավալված գործընթացներին և դատարանները շրջափակելու կոչին և օրինակ բերեց, թե ինչպես երկու դատավորի խոչընդոտել էին իրենց աշխատավայր հասնել:

«Նրանց, փաստորեն, խոչընդոտում էին, որ նրանք գնան դատարան և զբաղվեն իրենց մասնագիտական գործունեությամբ: Եթե դու դրան գնահատական չես տալիս, բայց երբ երկու երիտասարդ փողոցում տեսնում ես դատավորին և նրան հարց են ուղղում, դու դա որակում ես որպես քրեորեն հետապնդելի արարք, մենք այստեղ տեսնում ենք խտրական վերաբերմունք»,- ասաց :