Ռուսլան Բաղդասարյանի ամեն մի կոշտ հայտարարությունից հետո նոր քրգործի գործընթաց է սկսվում. փաստաբանը հերքում է

Երեկ` նոյեմբերի 6-ի երեկոյան, ոստիկանությունը հաղորդագրություն էր տարածել, որով Դավթաշեն վարչական շրջանի նախկին ղեկավար Ռուսլան Բաղդասարյանին մեղադրվում էր հափշտակություն կատարելու միասնական դիտավորության մեջ: Հափշտակության մասին ոստիկանության այս հաղորդագրությունը NEWSPRESS.am-ի հետ զրույցում հերքեց Ռուսլան Բաղդասարյանի շահերի պաշտպան Հրանտ Անանյանը:

Նրա խոսքով՝ ոստիկանության ոչ մասնագիտական մոտեցման պատճառով հայտարարությունն ընկալվում է որպես մեղադրանք: Նրա խոսքով՝ սա ժամանակից շուտ արված անհիմն հայտարարություն է:

 «Ընդամենը ինչ-որ նյութեր են նախապատրաստել, քրեական գործ են հարուցել և ուղարկել են Քննչական կոմիտե` նախաքննություն իրականացնելու համար: Մեղադրանք չի առաջադրվել Ռուսլան Բաղդասարյանին և նրան չեն էլ հրավիրել հարցաքննության: Ավելին` այս ամենի մասին իմացել ենք ոստիկանության կայքէջում հրապարակված նյութից»,- ասաց Հրանտ Անանյանը` նշելով, որ Բաղդասարյանը որևէ կերպ չի ծանուցվել:

Փաստաբանի խոսքով՝ այս պահին ոչինչ չեն նախաձեռնում անել, կսպասեն նախաքննության արդյունքներին: Նա նշեց նաև, որ հափշտակության մասին տեղեկատվությունը չի համապատասխանում իրականությանը:

«Հայտարարության մեջ ասվում է, թե «...վարչական շրջանի նախկին ղեկավարի բանավոր հրահանգների հիման վրա համայնքապետարանի տարբեր աշխատակիցներին ու վարչական շրջանի բնակիչներին ֆինանսական օգնություն տրամադրելու վերաբերյալ կազմվել ու ստորագրվել են կեղծ փաստաթղթեր, որոնց հիման վրա 2012-2014 թվականների ընթացքում հափշտակվել է 9.000.000 դրամից ավելի գումար». ես կատեգորիկ հերքում եմ դա, չկա նման բան»,-ասաց Հրանտ Անանյանն ու հավելեց, որ սա մարդու վարկանիշն և արժանապատվությունը կասկածի տակ դնող հայտարարություն է:

Հարցին, թե արդյոք քաղաքական հետապնդման միտում տեսնո՞ւմ է այս քրեական գործ հարուցելու գործընթացի հետ կապված, Հրանտ Անանյանը նկատեց, որ թեև չի ուզում խնդիրը քաղաքականացնել ու պատասխաններ փնտրել այս դաշտում, սակայն պետք է նկատի, որ սա Ռուսլան Բաղդասարյանի նկատմամբ քրգործ հարուցելու միակ փորձը չէ:

«Ռուսլան Բաղդասարյանի ամեն մի կոշտ հայտարարությունից հետո, նոր քրեական գործ բացելու գործընթաց է տեղի ունենում. նոր քննադատություն` նոր նյութերի նախապատրաստում, նորից քննադատություն` նորից նոր նյութեր, բայց դրանք բոլորն ընթացքի մեջ են ու դեռ ոչինչ չեն կարողանում ապացուցել: Սա էլ հերթականն էր... մեկնաբանությունները թողնում եմ Ձեզ»,- եզրափակեց Հրանտ Անանյանը:

Զրուցեց` Արմինե Մկրտումյանը