Մեզ ուզում եք ցուցո՞ւմ տալ` չի ստացվի. դուք դնում եք պառլամենտական ճգնաժամի սկիզբը. Մելքումյանը` իմքայլականին (տեսանյութ)

Ի՞նչ իրավունքով եք ցուցումներ տալիս մեզ: Ազգային ժողովում իր ելույթի ժամանակ այս հարցադրմամբ դիմեց «Բարգավաճ Հայաստան» խմբակցության պատգամավոր Միքայել Մելքումյանը` «Իմ քայլը» խմբակցության պատգամավոր Վլադիմիր Վարդանյանին:

Վերջինս պահանջում էր «ցուցում տալ», թե ինչպես են քվեարկելու մյուս երկու խորհրդարանական ուժերը:

«Դուք դրա իրավունքը ունե՞ք, չունեք, չէ՞»,- հարցրեց Մելքումյանն ու պարզաբանեց, որ դա նույնն է, թե իրենք էլ ցուցում պահանջեն իշխող մեծամասնության դեմ քվեարկելու համար:

Ընդհանուր առմամբ, Մելքումյանը դեմ չէ, որ որևէ օրինագծի մերժումը լինի իմաստային, բայց միևնույն ժամանակ նկատում է, որ մյուս ուժերն իրավունք չունեն նման տոնով ցուցումներ պահանջելու կամ գործընկերներին քմծիծաղով վերաբերվելու:

«Ո՞ւմ ա ձեռք տալիս տենց աշխատել, է՞դ ինչ բան ա: Եկեք, նորմալ աշխատում եք` աշխատեք, չեք աշխատում՝ ոչ մեկին էսպես ձեռք չի տալիս աշխատել»,- ասաց Մելքումյանն ու հիշեցրեց նաև երեկվա` նոյեմբերի 12-ին իր խմբակցության պատգամավոր Գևորգ Պետրոսյանի նկատմամբ տեղի ունեցած «հարձակումը»:

«Մենք մեր տեսակետն ունենք, հիմա դուք մեզ ուզում եք ցուցո՞ւմ տալ` չի ստացվի: Եթե դուք գնաք այդ ճանապարհով,  դուք դնում եք պառլամենտական, ժողովրդավարական գործընթացի ճգնաժամի սկիզբը»,- ասաց Մելքումյանն ու հավելեց. «Գիտեք, որ հեղափոխությունից առաջ և հետո մակընթացություններ ու տեղատվություններ են լինում. կլինեն մակընթացություններ, տեղատվություններ, բայց խոշորները մնում են, մենք մնալու ենք»,- ասաց ԲՀԿ-ական պատգամավորները:

Մանրամասները` տեսանյութում