Մենք մինչև օրս որևէ տվյալ չունենք, թե ով ինչ նպատակով ներխուժեց խմբագրություն. Քնար Մանուկյան (տեսանյութ)
2019 թվականի ընթացքում 4 դեպքերով, 4 քրեական գործերով բացառիկ մանրամասներ էին «Ժողովուրդ» օրաթերթի ձեռքում հայտնվել, որով նախաքննական մարմինները՝ և′ Քննչական կոմիտեն, և′ Դատախազությունը, և′ Հատուկ քննչական ծառայությունը փորձում էին մեզնից աղբյուր բացահայտել: Այդ մասին այսօր Հայաստանի ժուռնալիստների միության կազմակերպած «Մամուլի հետհեղափոխական մարտահրավերները. սպասելիքներ և անելիքներ» թեմայով քննարկման ժամանակ հայտարարեց «Ժողովուրդ» օրաթերթի գլխավոր խմբագիր Քնար Մանուկյանը:
««Ժողովուրդ» օրաթերթի խմբագրությունը որոշեց, որ պետք է հայտարություն տարածի՝ կոչ անելով վերջ տալ այս արշավին և թողնել, որ մենք իրականացնենք մեր մասնագիտական գործունեությունը:
Նա նշեց, որ 4 դեպքում նախաքննական մարմիններն իրենց գրություն են ուղարկել ու պահանջել բացահայտել աղբյուրը:
«Բայց մեր վերջին նախազգուշացումը նախաքննական մարմիններին որևէ արդյունք չտվեց, որովհետև 2019 թ. նոյեմբերի 20-ին բոլորդ ականատես եղաք, բոլորդ լսեցիք այդ մասին, թե ինչպես Հատուկ քննչական ծառայությունը՝ նախաքննական մարմինը, ինձ հրավիրեց ՀՔԾ և հայտնեց, որ, հարգելի Քնար, մենք հանել ենք Ձեր հեռախոսային խոսակցությունների վերծանումները և տվեցին 2-3 անուն և ասացին, որ խնդրում են ասել՝ ով է Ձեզ տվել Մարտի 1-ի գործով առանցքային պաշտոնյաների ցուցմունքները: Սա ինձ համար շոկային էր»,- նշեց նա:
Այս երևույթը խմբագիրը բնութագրեց մասնագիտական գործունեությունը խոչընդոտելու սարսափելի գործելաոճ: Մանուկյանը հիշեցրեց, որ այդ որոշումն ինքը բողոքարկել է Վերաքննիչ դատարանում, և վերաքննիչն ապացուցել է՝ ՀՔԾ- ապօրինությւոն է թույլ տվել:
Քնար Մանուկյանն անդրադարձավ նաև անհայտ անձանց կողմից «Ժողովուրդ» օրաթերթի խմբագրություն ներխուժելուն և ասաց, որ մինչ օրս հայտնի չէ, թե ով
«Իրավապահ մարմինները մինչ օրս վստահեցնում են, որ ամեն ինչ արել են ու անում են բացահայտելու համար, բայց, ըստ էության, իրենց խոսքերը միայն խոսքեր են, բայց մեզ պետք է արդյունքը: Մենք մինչև օրս որևէ տվյալ չունենք, թե ով ինչ նպատակով ներխուժեց խմբագրություն և սա կոնկրետ ինչ ազդակ էր մեզ՝ դադարեցրեք ձեր գործունեությունը կամ լռեք, հետևանքները այլ կլինեն»,- նշեց «Ժողովուրդ» օրաթերթի խմբագիրը: