Մեզ ոչ ոք չի կարող կանգնեցնել. Ալիևը նորից խոսել է «Զանգեզուրի միջանցքի» մասին ու հոխորտացել, թե հասնում են նրան, ինչին ցանկանում են

«Հայաստանը և ամբողջ աշխարհը տեսան, որ մեզ ոչ ոք չի կարող կանգնեցնել։ Պատերազմի ժամանակ մեզ կանգնեցնել ցանկացողներ կային, և դրանք բավականին ուժեղ շրջանակներ էին, բայց չկարողացան կանգնեցնել։ Ես ասացի, որ մեզ ասեն մեր հողերի ազատագրման օրը, և մենք պատրաստ ենք կանգ առնել։ Ես այսօր նույն խոսքերն եմ ասում. Հայտարարեք այն օրը, թե երբ կբացվի «Զանգեզուրի միջանցքը», և այս դեպքում խնդիրներ չեն լինի»,- ասել է Ադրբեջանի նախագահ Իլհամ Ալիևը Գուբայի շրջանի Գոնագքենդ գյուղի բնակիչների հետ հանդիպման ժամանակ, փոխանցում է «Ինտերֆաքս»-ը։

Ալիևը նշել է, որ Հայաստանի ղեկավարությունը և հայ համայնքը պետք է հասկանան դա. «Մենք հասել ենք մեր ուզածին, ձգտում ենք և հասնելու ենք։ Լավ կլիներ, որ այս հարցը լուծվեր կառուցողական, բանակցությունների և փոխըմբռնման ճանապարհով։ Որովհետև ղարաբաղյան երկրորդ պատերազմը ողջ աշխարհին ցույց տվեց մեր ժողովրդի կամքը, ուժն ու միասնականությունը»,- ասել է նախագահը։

Ալիևը նաև մեկնաբանել է Հայաստանում «ռևանշիզմի փորձերը». նրա խոսքով՝ եթե ռևանշիզմի միտում լինի, «այդ հարցը անմիջապես կլուծվի»։

«Պատերազմից հետո նման մի քանի փորձեր եղան Հայաստանի կողմից, և նրանք տեսան տխուր հետևանքներ։ Ուստի ուշ չէ, նրանք պետք է ընդունեն մեր պայմանները և վերջ տան ճանապարհների և հաղորդակցությունների նկատմամբ ոչ անկեղծ մոտեցմանը»,- ասաց նա։