Պտղնու տաճարը, Կարենիսի, Նեղուցի վանքերը և Թեժառույք վանական համալիրն ամրակայելու և վերականգնելու խնդիր ունեն (լուսանկարներ)

ՀՀ ԿԳՄՍ նախարարության պատմության և մշակույթի հուշարձանների պահպանության վարչության աշխատակիցները հերթական աշխատանքային այցն են կատարել՝ այս անգամ Կոտայքի մարզի մի շարք հուշարձանների տեղազննման, ընթացիկ աշխատանքների, առկա խնդիրների ուսումնասիրման և դրանք արձանագրելու նպատակով։

Աշխատանքային խումբը մասնավորապես այցելել է Պտղնու տաճար, Կարենիսի, Նեղուցի վանքեր, Թեժառույք վանական համալիր:

Մշտադիտարկման արդյունքում մասնագետներն արձանագրել են, որ նշյալ հուշարձանները, թեև նախկին տարիներին մասնակի ուսումնասիրվել, ամրակայավել և վերականգնվել են, սակայն այսօր կրկին ունեն ուսումնասիրելու, եղած նախագծանախահաշվային փաստաթղթերը լրամշակելու կարիք՝ դրանք ամրակայելու, մասնակի կամ ամբողջական վերականգնելու նպատակով։

Տեղում մշտադիտարկվել է Կարենիս գյուղի Մաթևոս և Անդրեաս առաքյալների վանքի վերականգնման ընթացքը, որն իրականացվում է բարերարի միջոցներով՝ լիազոր մարմնի կողմից համաձայնեցված գիտանախագծային փաստաթղթերի հիման վրա։

Տեղում քննարկվել են Նեղուցի և Թեժառույք վանական համալիրների մոտեցման ճանապարհների խնդիրները։ Մասնավորապես Թեժառույք վանական համալիրի մոտեցման ճանապարհը, որը խոչընդոտ է այցելուների և հատկապես անանցանելի է վերականգնողական աշխատանքներ սկսելու համար։