Սահմանադրական դատարանը հեռացել է Սահմանադրությունից․ սահմանադրագետ (տեսանյութ)
ԱԺ «Հայաստան» խմբակցության պատգամավոր, սահմանադրագետ Արամ Վարդևանյանը դժվարանում է շնորհավորել Սահմանադրության տոնի առիթով։ Ըստ նրա` Սահմանադրության տոնի առթիվ շնորհավորելը պարզապես ազնիվ չի լինի։
«Սահմանադրական տարբեր արժեքներ ու սկզբունքներ պարզապես ոչնչացվել են։ Մի քանի տարի առաջ, օրինակ, չէին կարող պատկերացնել, թե ինչպես երկրի իշխանությունները կարող են իրենց նպատակին հասնելու համար դատարաններ փակել, կամ ՍԴ դատավորներին փոխելու համար՝ ինչ է թե իրենց դուր չեն գալիս, փոխել հենց Սահմանադրությունը։ Դա այն ջրբաժանն էր, որն օրվա իշխանությունները գծեցին իրենց և Սահմանադրության միջև»,- ասաց սահմանադրագետը։
Նա հիշեց, որ մի ժամանակ մտածում էր, թե ինչպես բարձրացնել սահմանադրականությունը, սակայն այսօր խնդիրը ոչ թե այդ մակարդակը բարձրացնելն է, այլ առհասարակ Սահմանադրության դեֆիցիտն է։
Ըստ նրա՝ Սահմանադրությունն իր նպատակին չի ծառայում։
«Նման ճգնաժամային իրավիճակներում ամենամեծ ֆունկցիան իր վրա պետք է վերցներ Սահմանադրությունը, խնդիրների իրական լուծումների բանալին պետք է լիներ Սահմանադրությունը, սակայն տեղի ունեցավ այն, որի մասին չեմ ուզում խոսել»,- ասաց Արամ Վարդևանյանը՝ մատնաշելով ՍԴ կազմի փոփոխությունն ու Սահմանադրությամբ ամրագրված իրավունքների պաշտպանության ոտնահարումները։
Նա նկատեց, որ այսօր ՍԴ-ն հեռացել է Սահմանադրությունից։