«Բա հո դատարկ չի՞ մնալու, շենքը պետք է օգտագործվի․ բուհերի շենքերը կառավարությունը կարող է վաճառել»․ Դումանյան (տեսանյութ)

Ուզում եք ասել՝ հյուրանոցային տնտեսություն զարգացնելու համա՞ր ենք բուհերի շենքերը դատարկում ու Աշտարակում ակադեմիական կառույց ստեղծում։ Այս հարցադրմամբ լրագրողներին դիմեց ԿԳՄՍ նախարար Վահրամ Դումանյանը։ Վերջիններս հետաքրքրվեցին, թե արդյոք բուհերի շենքերը դատարկելն ինչ-որ անհատների շահեր չե՞ն հետապնդում, և արդյոք վաղը դրանք չե՞ն վերածվի հյուրանոցային համալիրների։

«Իհարկե ոչ, դա աբսուրդ է»,- ասաց Դումանյանը՝ միևնույն ժամանակ նշելով, որ եթե շենքը չօգտագործվի՝ այն կարող է նաև վաճառվել։

«Բա հո դատարկ չի՞ մնալու շենքը, պետք է օգտագործվի։ Երբ ձեզ մի լավ բնակարան են առաջարկում ու գնում, տեսնում եք՝ շատ լավ պայմաններ են՝ հին բնակարանն ի՞նչ եք անում»,- հարցադրմամբ դիմեց նա լրագրողներին։

Վերջիններս նույն հարցադրմամբ հակադարձեցին․ «ի՞նչ եք անում», ինչին Դումանյանն արձագանքեց, թե վաճառում են։

«Կառավարությունն էլ այդ շենքերը կարող է վաճառել, որ վարկը փակի, հո չի թողնելու, որ դատարկ շենք մնա՝ որպես թանգարան։ Ամեն ինչի համար կարող է օգտագործվել, այդ թվում՝ անվարձահատույց տրամադրվել այլ կազմակերպության՝ ինչի՞ մասին է խոսքը»,-ասաց ԿԳՄՍ նախարարը։

Մանրամասները՝ տեսանյութում