Ընդգծված է իսրայելյան ԶԼՄ-ների կողմից ցույցային այս ալիքի անհամեմատ մեծ լուսաբանումը. միջազգայնագետը վերլուծում է Իրանում ծավալվող ցույցերը
Իրանում հեղափոխության պահապանների կորպուսը երեկվանից ձեռնամուխ է եղել ծավալուն ցույցերը մարելու գործընթացին։ Ռաիսին վերադարձել է ՄԱԿ ԳԱ գագաթաժողովից ու մոտ օրերս Իրանի գործադիրից կլսենք, թե ով և ինչու էր կազմակերպել նման լայնածավալ դիվերսիան՝ ուղղված Իրանի ներքաղաքական ապակայունացմանը։ Այս մասին տելեգրամյան իր ալիքում գրել է միջազգայնագետ Աննա Աբրահամյանը:
«Ի սկզբանե, այս ցույցերը վերլուծելիս՝ նշել եմ նրանց բովանդակային և մասշտաբային տարբերությունները նախորդներից։ Ընդգծված է նաև իսրայելյան ԶԼՄ-ների կողմից ցույցային այս ալիքի անհամեմատ մեծ լուսաբանումը՝ զուգակցված սոցցանցային ընդլայնված անդրադարձերով թե՛ տարածաշրջանի հակաիրանական ճամբարներից, և թե՛ արտերկրում գործող հակաիրանական շարժումներ հրահրող ու համակարգող կենտրոններից։
Նկատելի էր այս ցույցերում ձևավորվող հստակ գունավոր-հեղափոխականության ատրիբուտների ամբողջականությունը.
1. մեկ ողբերգական դեպքի հիմքով արդարություն պահանջող ցույցերի օրակարգի զարգացումն ընդհուպ մինչև հեղաշրջման կոչերի;
2. զոհի բնութագրով հեղաշրջման պոստերի ձևավորումը՝ համապատասխան լոզունգներով;
3. մեծածավալ ֆլեշմոբեր մազերը կտրելով ու հիջաբը հանրայնորեն այրելով։ *ԿԱՐԵՒՈՐ ԱՍՊԵԿՏ*- Հիջաբը եղել է իսլամական հեղափոխության ամենակարևոր խորհրդանիշը։ Հիջաբն այն սահմանագիծն էր, որով Իրանի Իսլամական հեղափոխության հայրերն սկսել են շահի ու նրա արևմտյան ընկերների կողմից Իրան ներմուծված արքերի ու բարքերի դեմ պայքարը (սոցիալական արդարության տարրերից սկսած՝ ֆինանսա-տնտեսականով վերջացրած)։ Այնպես որ, ներկայիս ցույցերի ժամանակ հիջաբներն այրելն իրանցիների մոտ ասոցացվում է իսլամական հեղափոխության հաստատած արժեհամակարգի ոչնչացման հետ։
4. հաջորդիվ, ևս մեկ տարր, որն առանձնացնում է այս անգամվա ցույցերի ալիքը նախորդներից, տասնյակից ավել տեսագրություններ են, ուր ամբոխը «հանկարծ» նկատում է իրենց շարքերում քաղաքացիական հագուստով ծպտված Բասիժի ոստիկանի ու ցուցադրաբար դաժան ծեծի է ենթարկում նրան՝ սկզբում գետնին նետելով, ապա բոլոր կողմերից քարերով հարվածելով։ Այս որակի տեսանյութերը հիջաբի այրման տեսանյութերից ոչ պակաս ինտեսնիվությամբ են տարածվել սոցցանցերով մեկ, որով ընդգծված է, որ ոստիկաններից վախենալու կարիք չկա, այսպես ասած «ռեժիմը խուճապի մեջ» է և այլն։
5. ակնհայտ է նաև Իրանի՝ իբրև ազգային փոքրամասնությունների իրավունքները ոտնահարող երկրի իմիջի ստեղծման տենդենցը։ Էթնիկ քրդերն ու ազերիները նախ միաբանված են այս ցույցերով՝ համակարգված կերպով կոորդինացնելով միացյալ ջանքերը [երկուսի շարքերում էլ գործում են իսրայելյան և թուրքական ներազդեցության գործակալական ցանցեր], միաբանվելով Թեհրանից անկախանալու օրակարգերով։ Երկու համայնքներն էլ հիջաբ այրելու և ոստիկան ծեծելու կադրերի հետ միասին՝ ևս մեկ թեմատիկ ֆլեշմոբ են վարում. քաղաքի/գյուղի հրապարակում ջարդում, վար են գցում Իրանի դրոշով սյունը։ Իսկ ազերական համայնքներում, վար նետած իրանական դրոշի փոխարեն, բարձրացվում է այսպես կոչված «Հարավային Ադրբեջանի» դրոշը՝ ուղեկցված Մեծ Թուրանին միանալու պանթուրքիստական կոչերով։
Ցույցերի ինտեսիվությունը գնալով ավելացել է Երևանում Փելոսիի կատարած հայտարարություններից հետո։ Վրաստանում ի հայտ եկած իրանցի «հեղափոխականների» ֆոնին, կարելի է եզրահանգել, որ նման «քնած» բջիջներ կան նաև Հայաստանում և տազիկստանում, որոնք, Իրանում ցույցերի շարունակման դեպքում, կբերվեն ակտիվ կարգավիճակի»։