«Ընդունարանում բոլորը խառն են»․ Մալաթիա-Սեբաստիա վարչական շրջանի ղեկավարը կազատվի աշխատանքից․ իշխանությունները չե՞ն մարսել․․․

NEWSPRESS.am-ի տեղեկություններով՝ Երևանի Մալաթիա-Սեբաստիա վարչական շրջանի ղեկավար Սաշա Կատվալյանը հայտնվել է իշխանության թիրախում և նրան կհեռացնեն պաշտոնից:

Տեղեկություններ կան, որ իշխանությունները չեն մարսել Կատվալյանի գրառումը՝ ուղղված ոստիկաններին։ Նա նեղսրտել էր Եռաբլուրում տեղի ունեցած միջադեպից ու  ոստիկանների պահվածքից, երբ վերջիններս զոհվածների մայրերի ոտքերից ու ձեռքերից բռնած նրանց գետնին էին շպրտում։ 

Կատվալյանն իր գրառմամբ կոչ էր արել ոստիկաններին՝ չանցնել կարմիր գծերը։

Հիշեցնենք, որ վարչական շրջանի ղեկավարի հայրը՝ ազատամարտիկ Լյովա Կատվալյանը, մասնակցել է Արցախյան առաջին գոյամարտին ու զոհվել Լաչինի շրջանում տեղի ունեցած մարտերի ժամանակ (12.10.1965, Երևան – 29.7.1992, գ. Ղոչազ (Լաչինի շրջան)):

Կան նաև տեղեկություններ, որ Սաշա Կատվալյանի ազատումը կապված է նաև Հաղթանակ թաղամասի բնակիչներին հողի խնդրի հետ։ Թե կոնկրետ ինչ խնդիր է առաջացել Կատվալյանի հետ, NEWSPRESS.am—ը փորձեց պարզել հենց նրանից։ Սակայն մեր զանգերն ընդունարան՝ մնացին անպատասխան։ 

Թեժ գծից էլ մեզ պատասխանեցին, որ «ընդունարանում խառն են՝ կապված փոփոխությունների հետ»։

Մեզ հետ զրույցում, թաղապետարանի աշխատակցուհին նշեց, որ փոփոխություններ են սպասվում։ 

Ճշտող հարցին, թե արդյոք այդ փոփոխությունը Սաշա Կատվալյանին ևս կվերաբերի, աշխատակցուհին պատասխանեց․ «Դե հա՛, էլի» և հորդորեց ավելի ուշ զանգահարել ընդունարեն․ «Բոլորը խառն են, բայց գուցե պատասխանեն»,- ասաց նա։

Արմինե Մկրտումյան