Դա խրճիթ չէ. Ալեն Սիմոնյանը վստահեցնում է՝ զինծառայողներն ապահովված են ամեն ինչով. Ալեն Սիմոնյան (տեսանյութ)
ԱԺ նախագահ Ալեն Սիմոնյանը վստահեցնում է՝ մարդիկ, որոնք պատասխանատու են անվտանգության համար, պատժվել են և պատժվելու են:
Լրագրողների հետ զրույցում անդրադառնալով պատգամավորների պարգևավճարների և այլ ուղղությամբ ծախսված գումարների մասին դիտարկմանը՝ Սիմոնյանը վստահեցրեց. «Հայաստանի Հանրապետությունը բանակի վրա ծախսելու համար գումարի որևէ խնդիր չունի: Եվ որևիցե դեպք չի եղել և չկա՝սկսած 2018 թվականից, որ գումարի պատճառով մենք որևիցե գնում չկատարենք»:
Հարցին, թե արդյոք քաղաքական պատասխանատվության խնդիր չէ, որ զինվորը հայտնվել է այդ իրավիճակում, որ նա ոչ թե զորամասում կամ խրամատում է, այլ ինչ-որ խրճիթում, ԱԺ նախագահն արձագանքեց. «Դա խրճիթ չէ, դրանք տներ են, որ շինարարական կամ սակրավորների ջոկատները այդտեղ են բնակվում: Նրանք ապահովված են ամեն ինչով, բացի անվտանգության նորմերից, որոնք խախտվել են և որի հետևանքով տեղի է ունեցել այդ դեպքը: Իրենք ամեն ինչով ապահովված են եղել, բայց եթե բենզինը լցնում ես կրակի վրա...»:
Սիմոնյանի խոսքով՝ զինվորների այդ կացարանները սեփական տներ են, որոնք բավականին լավ վիճակում են գտնվում, ապահովված են ամեն ինչով: Նա նշեց, որ հրդեհված տան կողքի տունը նույն ձևի տուն է՝ ապահովված ամեն ինչով՝ սկսած վառելիքից՝ հավելելով, որ դժբախտ դեպքը չի կարելի շահարկվել: «Դժբախտ դեպք է պատահել, մեղավորները պատժվել են ու պատժվելու են»,-ասաց նա: