Արթուր Հովհաննիսյանը Նիդերլանդների ներկայացուցիչներին է ներկայացրել ժողովրդավարության ուղղությամբ նախատեսվող ծրագրերը
ՀՀ ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը հունվարի 24-ին հանդիպել է Բազմակուսակցական ժողովրդավարության նիդերլանդական ինստիտուտի ծրագրերի և գիտելիքի հարցերով տնօրեն Վուտեր Դոլի ու ծրագրի ավագ խորհրդական Ռիմ Յուդեի հետ:
ԱԺ-ից հայտնում են, որ Վուտեր Դոլը, ներկայացնելով Հայաստան այցելության առաջնային նպատակը, նշել է, որ իրենք մեր երկրում նախատեսում են իրականացնել «Քաղաքական կուսակցությունները՝ հանուն ներառական ժողովրդավարության» ծրագիրը, որի շրջանակում ցանկություն ունեն համագործակցելու ինչպես խորհրդարանական 3 խմբակցությունների, այնպես էլ արտախորհրդարանական ուժերի հետ: Ընդգծելով ծրագրի հիմնական նպատակը՝ Վուտեր Դոլը շեշտել է քաղաքական գործիչների և կուսակցությունների կարողությունների զարգացումը և վերջիններիս կողմից Հայաստանի քաղաքական և ժողովրդավարական գործընթացներում բովանդակային ներգրավվածության ապահովումը:
Ողջունելով հյուրերին Հայաստանում և ՀՀ Ազգային ժողովում՝ Արթուր Հովհաննիսյանը մաղթել է արդյունավետ աշխատանք եւ պատրաստակամություն է հայտնել աջակցելու իրականացվելիք ծրագրին:
Հյուրերի խնդրանքով խմբակցության քարտուղարը պատմել է «Քաղաքացիական պայմանագիր» կուսակցության ստեղծման պատմության, կառուցվածքի մասին: Նա անդրադարձել է 2018 թվականին տեղի ունեցած ոչ բռնի, թավշյա, ժողովրդավար հեղափոխությունից հետո ձևավորված ներհայաստանյան քաղաքական դաշտի առանձնահատկություններին, ժողովրդավարության զարգացման ուղղությամբ արձանագրված հաջողություններին ու նախատեսվող ծրագրերին:
Հանդիպման ընթացքում անդրադարձ է կատարվել իշխանություն-ընդդիմություն հարաբերություններին:
Կողմերը քննարկել են նաև վերոնշյալ ծրագրի իրականացմանը վերաբերող հարցեր, ձեռք են բերել պայմանավորվածություն՝ համագործակցել կուսակցությունների ու քաղաքական գործիչների կարողությունների զարգացման և ժողովրդավարական գործընթացներում բովանդակային ներգրավածություն ապահովելու ուղղությամբ: