Եթե բեկորը չի՞ սպանել Աշոտին, նա հերո՞ս չէ, Աննա Հակոբյանը հերոսածին մա՞յր չէ, ո՞վ է որոշել․ Փաշինյան

Ես ծնկի եմ գալիս մեր բոլոր նահատակների, նրանց շիրիմների առաջ, խոնարհվում բոլոր ծնողների, նրանց երեխաների առաջ՝ առանց բացառության։ Նույնկերպ ծնկի եմ գալիս և խոնարհվում ՀՀ-ին զինվոր տված ցանկացած ծնողի առաջ։ Ծնկի եմ գալիս նաև ՀՀ-ի առաջ իրենց պարտքն օրենսդրական և սահմանադրական պարտքը կատարած բոլոր զինվորների առաջ և ոչ միայն։ Այս մասին մամուլի ասուլիսի ժամանակ ասաց Նիկոլ Փաշինյանը։

Շարունակելով իր խոսքը՝ Փաշինյանն անդրադարձավ, ըստ իրեն, հարցի բարոյական կողմին։ 

«Մի քիչ հեռվից ներկայացնեմ։ Դեպքը տեղի է ունեցել ՀՀ քաղաքացի քաղաքացի Աշոտ Փաշինյանի հետ։ Ո՞վ է Աշոտ Փաշանյանը։ Նա մի քաղաքացի է, որը 2020թ․-ի սեպտեմբերյան պատերազմի ժամանակ որպես կամավոր զինվորագրվել է բանակ, ընդ որում՝ ՀՀ օրենսդրության համաձայն ինքը զորակոչի ենթակա չի եղել, որովհետև նոր էր ավարտել զինվորական ծառայությունը։ Ես ժամանակին ասել եմ, որ օրենսդրական կարգավորումը մի քիչ լավ չեմ հասկանում։ Բայց այդ թեման չենք քննարկում։ Մենք չենք այդ օրենքն ընդունել, այն շատ վաղուց է ընդունվել»,- նշեց Փաշինյանը։

Նրա խոսքով՝ այդ որոշումը Աշոտ Փաշինյանը քննարկել է իր հոր և մոր հետ։ Եվ այդ պահին նա եղել է ՀՀ վարչապետ հանդիսացող անձի, ՀՀ ղեկավարի որդի։ Ինքն այդ որոշումը կայացրել և զորակոչվել, գնացել է առաջնագիծ։

«Մարտական հանձնարարություն կատարելու ժամանակ ես մի դրվագի մասին կխոսեմ։ Հրետանակոծության կամ հրթիռակոծության տակ է ընկել իր ջոկի հետ։ Եվ այդ ժամանակ իր ծառայակից ընկերը, որի հետ իրենք ըստ էության պատսպարված, իրար մարմնով կպած են եղել, իր ընկերը զոհվել է։ Ես կարծում եմ, որ պարզ է բոլորիս, ոչ ոք որոշում չի կայացրել, որ Աշոտ Փաշինյանը չպետք է զոհվի։ Ոչ ոք չէր կարող որոշել և կանխորոշել, որ այդ բեկորը չի սպանելու իմ որդուն։ Դա բացառված է ուղղակի։ Ես ուզում եմ մի հարց տալ։ Եթե բեկորը սպաներ Աշոտ Փաշինյանին, նա կլիներ հերոս, իսկ եթե չի սպանել այդ բեկորը նրան, միլիմետրերով անցել է իր կողքով, նա դառնում է հակահերո՞ս։ Եթե այդ բեկորը սպաներ Աշոտ Փաշինյանին, Աննա Հակոբյանը կլիներ հերոսածին մայր, իսկ հիմա, որ միլիմետրերով անցել է բեկորը, Աննա Հակոբյանն էլ հերոսածին մայր չէ՞։ Ինչո՞վ հերոսածին մայր չէ։ Որևէ մեկը կարո՞ղ է այն բացատրել։ Եվ առավելևս այն պայմաններում այդ նույն ժամանակ Աննա Հակոբյանը գտնվում էր առաջնագծում՝ զենքը ձեռքին»,- նշեց Փաշինյանը։ 

Նրա խոսքով՝ մարդիկ ուզում են ավարտին հասցնել այն առաքելությունը, որն ավարտին չի հասցրել ադրբեջանական բեկորը։