«Եթե մենք ընտրված չլինեինք՝ պարտադրանք կարող էր լինել. Հայաստանն այսօր մեծ հաջողություններ է գրանցում. Սիմոնյանը՝ «միջանցքի» մասին (տեսանյութ)

Եթե ՀՀ իշխանությունն ընտրված չլիներ, «միջանցքի» պարտադրանք կարող էր լինել: Այս մասին ԱԺ-ում լրագրողների հետ զրույցում ասաց ԱԺ նախագահ Ալեն Սիմոնյանը: 

Նա հնարավոր չի համարում, որ Էրդողանի` Բաքու այցից հետո, Ադրբեջանը կարող է կոշտացնել հռետորաբանությունը:

«Չէ, կոշտացնելը հո դրանո՞վ չի պայմանավորված, պայմանավորված է մեր դիրքից, մեր ասելիքից, մեր միջազգային գործընկերների հետ համագործակցությունից: Պետք է նորից օրինակ բերեմ միջանցքի մասին խոսակցությունը, տեսաք՝ հայկական կողմը դրսևորեց իր կամքն ու մինչև վերջ ասաց, որ նման բան չի լինելու, կարծես թե, այդ ընկալումը եղավ, որ, իրոք, նման բան ո՛չ նախատեսվել է, ո՛չ էլ դրա մասին խոսվել է, չնայած, որոշները փորձեցին սակարկել, թե Նիկոլ Փաշինյանն ինչ-որ բան է խոստացել»,- ասաց նա՝ հավելելով, որ այդ դիրքորոշումն անգամ Ադրբեջանի հռետորաբանությունից դուրս է եկել:

Սիմոնյանի խոսքով՝ հայկական կողմի վրա պարտադրանք չի կարող լինել, որովհետև ՀՀ իշխանությունն ընտրված է. «Եթե մենք ընտրված չլինեինք՝ այո՛, պարտադրանք կարող էր լինել: Հայաստանն այսօր մեծ հաջողություններ է գրանցում ժողովրդավարության մակարդակով. ճի՛շտ է, մենք մեր սխալներն ունենք, ամեն ինչ չէ, որ իդեալական է, բայց ակնհայտ է առաջընթացը, իշխանության կամքը՝ եղած խնդիրները լուծելու ու շտկելու, դա չի կարող անարձագանք մնալ»,- հավելեց ԱԺ նախագահը: