Ինչպե՞ս եղավ, որ ինքնակամ շինությունների դեմ «պայքարող» Ավինյանի քթի տակ՝ շենքի տանիքին, կառուցապատում են (տեսանյութ)

Օրենքով կարգավորվել են ինքնակամ շինության քանդման որոշումները, և տեղական ինքնակառավարման մարմինները պետք է ապահովեն բազմաբնակարան շենքի ընդհանուր օգտագործման տարածքների ապօրինի զավթման կանխարգելումը, դրանց հետևանքների վերացմանը, այսինքն՝ ինքնակամ շինությունները պետք է քանդվեն:

Սակայն, մեկը մյուսի հետևից, Երևանի բազմաբնակարան շենքերի տանիքները, որտեղ սեփականատերը համայնքն է, դառնում են մեկ հոգու պատկանող սեփականություն:

Մի կողմից քաղաքապետարանը ցուցադրաբար «անտեր» ինքնակամ շինություններ է քանդում, մյուս կողմից՝ աչք փակում օրը ցերեկով, բոլոր աչքի առաջ տեղի ունեցող ապօրինաշինությանը՝ մայրաքաղաքի հենց կենտրոնում:

NEWSPRESS.am-ը ֆիքսել է Երևանի Թումանյան 39 հասցեում գտնվող բազմաբնակարան շենքի տանիքի կիսակառույց ինքնակամ շինությունը:

Մենք չէ, բայց մասնագետները վստահեցնում են՝ շենքի մանսարդներում իրականացվող շինարարությունները չեն համապատասխանում քաղաքաշինական և սեյսմիկ անվտանգության նորմերին և իրականում անմիջական վտանգ են պարունակում հենց այդ կառույցն իրականացնողի և շենքի բոլոր բնակիչների համար:

NEWSPRESS.am-ը դիմում է Երևանի քաղաքապետարանին հարցով, թե ո՞վ է (կամ ովքեր են) իրականացնում շինարարությունը, ի՞նչ է կառուցվում շենքի տանիքին և ո՞ւմ թույլտվությամբ (եթե կա թույլտվություն):

Ի դեպ, հարկ է նկատել, որ դեռևս 2022թ. դեկտեմբերին, փոխքաղաքապետ Տիգրան Ավինյանը, ով այժմ իր ձեռքն է վերցրել քաղաքապետի պաշտոնավարման առյուծի բաժինը, կառավարությանը ներկայացրել է ինքնակամների քանդման անհրաժեշտությունը:

Ու հիմա հարց է առաջանում, թե այս ինչպե՞ս եղավ, որ ինքնակամ շինությունների դեմ «պայքարող» Ավինյանի քթի տակ՝ կենտրոնի շենքերից մեկի տանիքին, կառուցապատում են իրականացնում:

Արմինե Մկրտումյան