Ես քննարկման մեջ չեմ մտել․ Փաշինյանը՝ Ակնայով Ստեփանակերտին օգնություն տրամադրելու՝ Շառլ Միշելի հայտարարության մասին

Իրադրությունը, որը մենք ունենք, և այդ իրադրության կարգավորումը ոչ թե միջազգային հանրությանն է հարկավոր, այլ Հայաստանին և Լեռնային Ղարաբաղին։ Այս մասին ասուլիսի ժամանակ ասաց Նիկոլ Փաշինյանը։

«Միջագային հանրությունը չի տառապում իրավիճակի կարգավորման հարցով։ Իսկ ո՞վ է ասել, որ նրանց ավելի շատ է հարկավոր պրոբլեմների լուծումը, քան ՀՀ-ին։ Եվ հարց՝ արդյոք միջազգային հանրությունը քայլեր ձեռնարկո՞ւմ է ԼՂՀ շուրջ հարցի կարգավորման հարցում, իհարկե, այո»,- ասաց Փաշինյանը։

Նա նկատեց, որ միջազգային տարբեր կառույցներ հստակ դիրքորոշում են արտահայտել հարցի կարգավորման շուրջ, բայց միևնույն ժամանակ նա նշեց, որ այդ ջանքերը բավարար չեն։

Ինչ վերաբերում է Բրյուսելում կայացած եռակողմ հանդիպմանը, ապա այնտեղ, Փաշինյանի խոսքով, քննարկվել է Լաչինի միջանցքի (Քաշաթաղի միջանցք-NEWSPRESS.am) հարցը, քանի որ, ըստ նրա, 2020 թվականի նոյեմբերի 9-ի պայմանագրով ինքն ունի մանդատ՝ միայն միջանցքի հարցի քննարկման համար։

Իսկ այն, որ այդ հանդիպումից հետո Շառլ Միշելը խոսեց Ակնայով Ստեփանակերտին  օգնություն տրամադրելու մասին և ասաց, որ դա կարևոր առաջարկ է, Փաշինյանը չի մեկնաբանում։ Նա վստահեցնում է, որ ինքն այդ հարցում դիրքորոշում չի արտահայտել։

Նա չի հերքում, որ նման հարց քննարկվել է, բայց վստահեցնում է, որ ինքը քննարկման մեջ չի մտել։

«Ես ասել եմ, որ ո՛չ անհրաժեշտություն ունեմ, ո՛չ էլ մանդատ՝ այդ հարցը քննարկելու համար»,- ասաց Փաշինյանը։