Ռոման Մովսիսյանն սպանություն չի կատարել․ մարդուն պահել են կալանքի տակ, ասել՝ ցուցմունք տուր Ռոմանի դեմ, քեզ բաց թողենք․ փաստաբան

Մոտ 3 տարի է` ընթանում է 2018 թվականին «Ոսկե աքաղաղ» ռեստորանային համալիրում կայացած խնջույքից հետո տեղի ունեցած դեպքի առնչությամբ հարուցված քրեական գործի դատավարությունը։

Ըստ պաշտոնական վարկածի՝ Ռոման Մովսիսյանը մեղադրվում է իր մանկության ընկերոջ՝ Ռազմիկ Ներսիսյանի սպանության մեջ։

«Մենք գտնում ենք, որ այստեղ սպանություն չկա․ Ռոման Մովսիսյանն ու Ռազմիկ Ներսիսյանը եղել են մանկության շատ մտերիմ ընկերներ»,- NEWSPRESS.am-ի հետ զրույցում ասաց Ռոման Մովսիսյանի պաշտպան Ռուբեն Բալոյանը։

Պաշտպանի խոսքով` թեև քրեական գործով Ռոման Մովսիսյանն անցնում է որպես ամբաստանյալ, ով իբր ծեծի է ենթարկել Ռազմիկ Ներսիսյանին, սակայն չկա որևէ ապացույց, որ Ռոմանը հարվածել կամ ծեծի է ենթարկել Ռազմիկ Ներսիսյանին։

«Նման բան չկա ու նման բան ասող էլ չկա։ Հակառակը՝ դատարանում վկաները նշել են, որ աղմուկի վրա մոտեցել են։ Ռոմանը գոռացել է՝ օգնեք, ջուր բերեք․ դա մարդ սպանողի գործողություն չէ։ Իրենք մտերիմ ընկերներ են եղել, շատ մտերիմ»,- մեզ հետ զրույցում ասաց փաստաբանը։

Նա նշեց, որ այս ընթացքում կատարվել է փորձաքննություն, որի արդյունքում փորձագետներն ասել են՝ այն հագուստով, որով եղել է տուժողը, հնարավոր չէր ընկնել մեքենայից։ Ռուբեն Բալոյանը պնդում է, սակայն, որ դա փաստ է՝ Ռազմիկ Ներսիսյանն ընկել է մեքենայից։ Իսկ հագուստը եղել է լվացված։

«Փորձաքննության ժամանակ հագուստը լվացած է եղել, ու քննիչը դատարանից այդ փաստը թաքցրել է»,- ասում է փաստաբանն ու նշում նաև, որ տուժողի մայրն էլ պնդել է, որ հագուստն ընկերներն են լվացել՝ թաքցնելով այն փաստը, որ դա ոչ թե ընկերների, այլ իրենց բարեկամների ձեռքի գործն է։

Փաստաբանն ընդգծում է, որ այս գործում մեծ խնդիր կա։ Նրա խոսքով` հետագայում փորձագետները հրաժարվել են իրենց տված ցուցմունքից, իսկ դատաբժիշկների տված ցուցմունքի հետ էլ անհամաձայնություն ու հակասություններ կան։

Ուստի, փաստաբան Ռուբեն Բալոյանը պահանջել է կրկնակի դատաբժշկական փորձաքննություն նշանակել։

«Մենք պետք է ոչ թե միայն դատաբժիշկների ցուցմունքներով առաջնորդվենք, այլ փորձաքննության։ Դատաբժիշկները պնդում են, որ Ռազմիկը հարվածներ է կրել գլխին, բայց չէ՞ որ մեքենայից վայր ընկնելիս ու գլորվելիս կարող էր կրել այդ հարվածները։ Այն, որ փորձաքննության են ենթարկվել լվացած շորերը՝ անլուրջ ու անընդունելի է»,- նշում է փաստաբանը։

Նա նկատում է, որ բացի հագուստից, կան նաև տուժողի կոշիկները։ Այս մասով փորձագետներն այլ եզրակացություն ու ցուցմունք են տվել, քանի որ դրանք լվացված չեն եղել։

«Կոշիկները չեն լվացվել, ու այդ մասով 2 փորձագետ է հարցաքննվել, ովքեր նշել են, որ այն վնասվածքները, որոնք կան կոշիկների վրա, մեքենայից վայր ընկնելու հետևանքով կարող էին առաջանալ։ Հակառակ հարցին, թե՝ իսկ կարո՞ղ էին այդ վնասվածքներն առաջանալ այն տուժողի կոշիկներին, ով ասֆալտին էր ընկել հարվածի հետևանքով, փորձագետները միանշանակ պնդեցին, որ չէին կարող առաջանալ»,- ասաց փաստաբանը։

Նա պնդում է, որ այս հարցում լուրջ հակասություններ են առաջացել, ինչպես նաև լուրջ խնդիրներ կան կապված վկաների հետ։ Փաստաբանը նշեց, որ գործով անցնող երկու կնոջ ապօրինի պահել են կալանավայրում։ Նա ընդգծում է, որ այս գործով բավականին ապօրինություններ են արված։

«Ցուցմունք ստանալու նպատակով, կանանց ապօրինի պահել են կալանքի տակ։ Դրա վերաբերյալ դատարանում 3 անձ ցուցմունք է տվել։ Այդ մասով ես բողոք եմ գրել մարզի դատախազին և ոչ մի լուրջ պատասխան չեմ ստացել, փոխանակ իրենք գործ հարուցեին ու քննություն կատարեին»,- ասաց Ռուբեն Բալոյանը։

Նա Ռոման Մովսիսյանին կալանքի տակ պահելու` միակ շահագրգռված անձ տեսնում է գործով դատախազ Կարեն Սուքիասյանին։

«Նա է թելադրում»,- ասում փաստաբանն ու կրկնում, որ Ռոման Մովսիսյանը սպանություն չի կատարել։

«Հասկանո՞ւմ եք՝ մարդը եկել, ասում է՝ իրեն կալանքի տակ պահել են, ասել՝ ցուցմունք տուր Ռոմանի դեմ, քեզ բաց թողենք կալանքից։ Ա'յ, նման ցուցմունքներ կան դատարանում տված»,-ասաց փաստաբանը՝ հավելելով, որ տեղի ունեցածը դժբախտ դեպք է, այդտեղ ընդհանրապես հանցանք չկա:

Հ․Գ․  Գործով դատախազը Լիդա Նանյանի թոռն է։ Նանյանը տարիներ առաջ զբաղեցրել է բավականին աչքի ընկնող պաշտոններ։

Արմինե Մկրտումյան