ԲԱՑԱՌԻԿ ՏԵՍԱՆՅՈւԹ՝ «Ոսկե աքաղաղ» ռեստորանային համալիրում կայացած խնջույքից՝ սպանություն որակված աղմկահարույց դեպքից առաջ

Առ այսօր ոչ մի փաստական հանգամանք չկա, որ  «Ոսկե աքաղաղ» ռեստորանային համալիրում կայացած խնջույքից հետո տեղի ունեցած դեպքը նախապես ծրագրավորված սպանություն է։ Ու չնայած դրան, 2018 թվականին տեղի ունեցած միջադեպի առնչությամբ հարուցվել է  քրեական գործ, որը մինչ օրս վիճարկվում է դատարանում։

Եթե ավելի կոնկրետ, ապա, ըստ պաշտոնական վարկածի` Ռոման Մովսիսյանը մեղադրվում է իր մանկության ընկերոջ՝ Ռազմիկ Ներսիսյանի սպանության մեջ։ Այն ընկերոջ, ում, ինչպես մտերիմներն են պատմում, թևի տակ առած, պահել է փոքր եղբոր նման։

Իհարկե, դեպքի հետ կապված որոշ մանրամասների հետքով, NEWSPRESS.am-ը և՛ զրուցել է Ռոման Մովսիսյանի փաստաբան Ռուբեն Բալոյանի հետ, և՛ եղել է դատական նիստերին ու լուսաբանել դրանք։

Դեպքի օրը Ռոման Մովսիսյանը մեծ շահում է ունեցել և ցանկացել է ուրախությունը կիսել մտերիմ ընկերների հետ, այդ թվում նաև՝  Ռազմիկ Ներսիսյանի։

Այդ օրվա խնջույքի հետ կապված առկա է 7 տեսանյութ, որտեղ ընկերներն անհոգ և բարձր տրամադրությամբ շփվում են իրար հետ և ուրախանում։

Բոլոր տեսանյութերը փաստում են, որ կանխամտածված սպանության մասին խոսք լինել չի կարող։ Տեղի ունեցածը տհաճ միջադեպ է, որից միայն 11 օր անց  Ռազմիկ Ներսիսյանը մահացել է։ 

Ընդ որում, Ռոմանը հանդիսացել է Ռազմիկին առաջին օգնություն ցույց տվողներից մեկը, ինչպես նաև, նրա նախաձեռնությամբ է Ռազմիկն անմիջապես տեղափոխվել հիվանդանոց։

Իհարկե, դեպքի հետ կապված կան շատ մանրամասներ, որոնք կարող եք ինչպես ընթերցել վերոհիշյալ ընդգծված հղումներով, այնպես էլ դիտել այս հղմամբ․․․

Բոլոր հրապարակներում նշված մանրամասներից պարզ է դառնում, որ «ծրագրավորված կամ կանխամտածված սպանություն» եզրույթը պարզապես, «կարվել է» Ռոման Մովսիսյանին, կամ, ինչպես ասում են, գցել են նրա գրպանը։ Համենայնդեպս, քրեական գործում ներկայացված փաստերը ցույց են տալիս, որ գործով վկաները, ինչ-որ մի փուլում, գտնվելով անազատության մեջ ու ենթարկվելով շանտաժի՝ ցուցմունք են տվել Ռոման Մովսիսյանի դեմ։

Իսկ երբ այդ ցուցմունքների դիմաց նրանք հայտնվել են ազատության մեջ, պատմել են իրականությունը, որտեղ ոչ մի խոսք չի եղել կանխամտածված կամ ծրագրավորված սպանության մասին։

Դեկտեմբերի 8-ին կկայանա քրեական գործով հերթական դատական նիստը։ Իսկ մինչ այդ, ներկայացնում ենք «Ոսկե աքաղաղ» ռեստորանային համալիրում կայացած խնջույքից  մի տեսանյութ, որը տեսանկարահանվել է նույն օրը՝ միջադեպից առաջ։ 

Ավելացնենք միայն, որ մահացածը՝ կարմիր շապիկով երիտասարդն է, որին իբրև սպանել է նրա կողքին նստած և ընկերաբար գրկած երիտասարդը՝ Ռոման Մովսիսյանը։

Արմինե Մկրտումյան