Էրդողանը խոսել է Ռուսաստանի և Չինաստանի միջև դաշինքի մասին

Թուրքիայի նախագահ Ռեջեփ Թայիփ Էրդողանը հայտարարել է, որ Արևմուտքը լուրջ մտահոգված է Ռուսաստանի և Չինաստանի միջև հարաբերությունների զարգացմամբ:

Այս մասին Թուրքիայի ղեկավարը լրագրողներին ասել է ՆԱՏՕ-ի գագաթնաժողովից վերադառնալիս։

«Մենք կանգնած ենք աշխարհակարգի հետ, որտեղ գերակշռում են հզորները: Օրինակ՝ Ռուսաստանը համերաշխ է Չինաստանի հետ։ Իսկ դա լրջորեն անհանգստացնում է Արեւմուտքին։ Նա Ուկրաինային ամեն տեսակի աջակցություն է ցուցաբերում՝ թե՛ ֆինանսական, թե՛ նյութական, այդ թվում՝ զենք ու զինամթերք։ Չնայած այս ամբողջ օգնությանը, արևմտյան երկրները դեռ չեն հասել այն արդյունքներին, որոնք ցանկանում են:

Նրանց համար երաշխիքն ու հավաստիացումն այն է, որ ՆԱՏՕ-ն գոյություն ունի որպես մեծ ուժ, որի առաջնագծում ԱՄՆ-ն է: Բայց չնայած իր հզորությանը, անկարող է հասնել ցանկալի արդյունքների՝ մրցակցելով աշխարհի մյուս տերությունների հետ»,- հավելել է Էրդողանը։

Նա նշել է, որ Թուրքիայի դիրքորոշումն այս հարցում տարբեր է:

«Մենք կապ ենք պահպանում ինչպես Ռուսաստանի, այնպես էլ Ուկրաինայի հետ։ Միաժամանակ մենք ձգտում ենք լինել հնարավորինս արդար։ Մեր այս դիրքորոշումը ժամանակ առ ժամանակ կարող է անհանգստացնել թե՛ Ռուսաստանին, թե՛ Ուկրաինային։ Բայց մենք կրկնում ենք, որ այս երկու երկրներն էլ մեր հարեւաններն են, որոնց հետ մենք պատմական, լուրջ հարաբերություններ ունենք»,- եզրափակել է Էրդողանը։