Անունը կա՝ ամանումը չկա․ շուրջ 1500 չափահաս քաղաքացի ունեցող թաղամասում կանգառ չկա, թաղամասից ելքն էլ հետիոտնի համար բացառապես աստիճաններով է (լուսանկարներ)

Երևանի քաղաքապետարանի` ձեռագիր դարձած կիսատ-պռատ աշխատելու հետևանքով Երևանի Առնո Բաբաջանյան փողոցի Բ4 թաղամասի բնակիչները զրկվել են նախկինում ունեցած կանգառից:

Կանգառը՝ նախկինում

Թաղամասի ճանապարհները վերաձևելուց, այն Հյուսիս-հարավին հարմարեցնելուց հետո, շուրջ 1500 ընտրող ունեցող թաղամասի բնակիչները գրեթե ամենօրյա ռեժիմով խոսակցությունների մեջ են հայտնվում ավտոբուսների վարորդների հետ. վարորդը որտեղ ուզում` կանգնում է: Չի ուզում` չի էլ կանգնում, եթե անգամ սեղմել ես «Կանգ» կոճակը: 

«Յանդեքս» համակարգը ճանապարհի թե մեկ, թե մյուս կողմում ճանաչում է կանգառները, իսկ իրականում` գետնի վրա, կանգառները մոտավորապես են: Ավելի անկեղծ ասած` չկան: 

Կանգառը՝ ըստ Յանդեքսի

Քարտեզով կանգառի տարածքը՝ իրականում

Ճանապարհի մի կողմում, շինարարական աշխատանքներից հետո, կանգառի նշանը տեղադրվել էր, այնուհետև ինչ-որ ակտիվիստներ բողոքեցին, թե կանգառը նորմալ կահավորել է պետք: Ի՞նչ արեց քաղաքապետարանը: Տարածքը որպես «կանգառ» կահավորելու փոխարեն, ընդհանրապես հանեց նաև կանգառի նշանը: Չկա գլուխ` չկա գլխացավ:

Ընդհանուր առմամբ, ճանապարհի կառուցմամբ, այս թաղամասի բնակիչները միայն այս հարցում չէ, որ տուժել են: Հերիք չէ, որ մի քանի տարի տևած շինարարությունը, որի ընթացքում 3 քաղաքապետ է փոխվել, բնակիչներին մշտական փոշու մեջ է պահել, հիմա էլ այս խնդիրներն են առաջ եկել: 

Հետիոտնի համար թաղամասից դուրս գալու երկու ճանապարհներն էլ վերնանցումներով են, որոնց վերելակների տեղադրում կամ շահագործումն ուշանում ու ուշանում է: Իսկ ի՞նչ անեն, օրինակ, սայլակով տեղափոխվող, կամ ֆիզիկական դժվարություն ունեցող մարդիկ: Վերնանցումներն իրենց հերթին լուսավորված չեն, և աստիճաններն էլ օրվա մութ ժամերին իջնել-բարձրանալ պետք է «ֆանարիկներով»:

Մի «լավություն» էլ այս թաղամասի մեքենա շահագործողների համար են մտածել  ճանապարհը կառուցողները. թաղամասից դուրս եկող մի «սար» են սարքել ու դրել «զիջիր» նշանը: Պարզապես մի բան հաշվի չեն առել, որ սա Երևանն է և մեքենաները մեծամասամբ քաղաքային՝ ցածր են: Դրանք այնքան բարձր չեն, որ այդ «սարի գագաթը» հասնելուն պես մեքենաների տակը չվնասվի: Հետո էլ, «մեջքի կախված» վիճակում պետք է մնան այնքան, մինչև այդ ճանապարհի մեքենաները վերջանան, նոր միայն շարունակեն երթևեկը: 

Մի խոսքով` սա փոքրիկ տգեղ դարձերեսն է այն իրականության, որը մեզ վաճառում են իբրև թանկարժեք տրանսպորտ, հպարտ քաղաքացի, խիստ քաղաքապետ... 

Հ.Գ. Քաղաքապետի խոսնակը երեք օր շարունակ մեր զանգերին կա'մ չի պատասխանում, կա'մ անջատում է: