Հայաստան եկող զբոսաշրջիկների թիվը մեծ թափով նվազում է

Այս տարի հունվար-հուլիսին Հայաստան եկած զբոսաշրջիկների թիվը նախորդ տարվա նույն ժամանակահատվածի համեմատ նվազել է  61 184-ով կամ 6.1 տոկոսով։ Այս մասին տեղեկացնում է Panorama.am-ը։

Հայաստանի վիճակագրական կոմիտեի փոխանցմամբ, այս տարվա առաջին յոթ ամիսներին Հայաստան է եկել 946 162 զբոսաշրջիկ,  նախորդ տարվա 1 004 346-ի փոխարեն։

9 տոկոսով նվազել է այն զբոսաշրջիկների թիվը, որոնք նախընտրում են մնալ հյուրանոցներում։

Սրան հակառակ 9.4 տոկոսով ավելացել է Հայաստանից զբոսաշրջության նպատակով մեկնողների թիվը։  Հունվար-հուլիս ամիսներին որպես զբոսաշրջիկ տարբեր երկրներ մեկնել է 705 105 մարդ նախորդ տարվա 644 646-ի համեմատ։ Ուշագրավ է, որ մեկնողների գերակշիռ մասն իր ուղևորությունը կազմակերպում է ինքնուրույն։


Ավելի վաղ տուրիստական գործակալ, տուրիստական ծրագրերի և երթուղիների համակարգող Լուսինե Հարոյանը, անդրադառնալով անկման պատճառներին, Panorama.am-ին ասել էր.

«Իրականում ավելի մեծ է անկումը։ Պաշտոնական վիճակագրությունը պարզապես շատ մեղմացված է։ Անկումը պայմանավորված է ներկայիս հակահայկական իշխանությունների վարած քաղաքականությամբ։ Սրան գումած Տուրիզմի կոմիտե ասվածը բացարձակապես ոչնչով չի զբաղվում, ես չգիտեմ, այնտեղ մարդիկ նստած ինչի՞ համար են աշխատավարձ ստանում։ Ասացեք ինձ, խնդրեմ, վերջին անգամ օրինակ վերջին երեք տարվա ընթացքում որևէ միջոցառում, որևէ բան կազմակերպե՞լ է Տուրիզմի կոմիտեն, լսա՞ծ կաք այդ մասին։ Ընդհանրապես, ոչ մի բան չի արվում։

Տպավորություն է,  ոչ թե տպավորություն է, հենց այդպես էլ կա, այդ մարդիկ գնում են առավոտից աշխատանքի, իրենց աշխատավարձերը բավականին բարձ ստանում են, գնում են տուն։ Հատկապես կոմիտեի նոր նախագահ Սիսիան Պօղոսեանի  նշանակելուց հետո ընդհանրապես որևէ բան չի արվում։ Պետք է շատ լավ տեղյակ լինել տուրիզմի ներքին խնդիրներին, որպեսզի մարդը կարողանա ինչ-որ բանով օգտակար լինել։ Այն, ինչ հիմա կատարվում է տուրիզմի կոմիտեում, լիովին տեղավորվում է այս իշխանությունների վարած քաղաքականության շրջանակում՝  կատարյալ բարդակ բոլոր ոլորտներում, փչացնել, կործանել ամեն ինչ։

Ես հիմնականում աշխատում եմ ռուսալեզու զբոսաշրջիկների հետ, տեղյակ եմ, որ անգամ ռուսական տուրիստական գործակալությունները մարդկանց խորհուրդ չեն տալիս գալ Հայաստան, դրա փոխարեն առաջարկում են այլ ուղղություններ՝ օրինակ, Ադրբեջանում, ասում են՝ Հայաստանում ստաբիլ վիճակ չէ, Հայաստանն արդեն մեր նկատմամբ վատ է տրամադրված։ Միջին վիճակագրական տուրիստը կլսի տուրիստական գործակալությանը։

Հայաստանում ցավալիորեն և միանգամայն օրինաչափորեն անկում կա, կարծում եմ՝ այն գնալով ավելի ու ավելի  զգալի է  դառնում, քանի դեռ այս իշխանություններ են ղեկավարում»։