Ընկալում կար, որ պետք էր գնալ, բռնել, ոլորել, ջարդել․ Նիկոլ Փաշինյան

Ընկալում կար, որ պետք էր գնալ, բռնել, ոլորել, ջարդել․ Նիկոլ Փաշինյան
«Հակակոռուպցիոն պայքարի տեմպերից մենք դժգոհ ենք, իսկ քաղաքացիներն ակնկալիքներ ունեն մեզնից և ձեզնից՝ որպես քաղաքական թիմի առաջնորդ, ի՞նչ լուծումներ եք տեսնում»,- ԱԺ-Կառավարություն հարցուպատասխանի ժամանակ ՔՊ-ական պատգամավոր Արեն Մկրտչյանը հարցն ուղղեց վարչապետ Նիկոլ Փաշինյանին։

Ես չեմ համարում, որ մենք բավարար արդյունավետությամբ ենք պայքարում կոռուպցիայի դեմ: Ինչ-որ առումով էլի ինձ մեղավոր եմ զգում, բայց չեմ պատկերացնում, թե ինչը ոնց պետք է անեի, որ էսպես չստացվեր։ Ժողովրդական ընկալում կար, որ պետք էր գնալ, բռնել, ոլորել, ջարդել։ Սա կարող է լինել էմոցիոնալ ընկալում, բայց ոչ պետական։ Այս մասին Ազգային ժողով-Կառավարություն հարցուպատասխանի ժամանակ հայտարարեց Նիկոլ Փաշինյանը։

Արեն Մկրտչյանը նկատեց, որ 2018թ․-ին հարցի լուծման՝ «բռնել», «ոլորել» տարբերակին շատերն էին վախեցած սպասում, ովքեր հետո չհասկացան, թե ինչո՞ւ իրենց հետևից չեն գնում․ «Հիմա այն վիճակի է հասել, որ երբեմն այս դահլիճում հանդգնում են հեգնել մեզ, թե ո՞ւր են մեր 50-50-ները։ Համակարծիք եմ, որ ինստիտուցիոնալ լուծումներ են պետք և ապօրինի ծագման գույքի բռնագանձման ինստիտուտն իր պտուղները վստահաբար կտա»,- ասաց Մկրտչյանը։

Ի պատասխան՝ Փաշինյանն արձագանքեց, որ 2018 թվականին ասել են, թե վենդետաներ չեն լինելու և շատերի հետևից այդ պատճառով է, որ չեն գնացել։