Վահե Ղազարյանը հասցրել է անշարժ գույք ձեռք բերել նաև Ռուսաստանու՞մ. նրա կենսագրության բազմաթիվ ամոթները

Արդեն նախկին դարձած Վահե Ղազարյանը ոստիկանության ու ներքին գործերի համակարգի թերևս ամենատխրահռչակ ղեկավարն է` այդ կառույցի ստեղծման ժամանակներից մինչ օրս:

Նրա ղեկավարման օրոք ոստիկանությունը չկարողացավ հավուր պատշաճի կազմակերպել կորոնավիրուսի կարանտինը, ինչի արդյունքում համավարակի բռնկումը մեր երկրում խայտառակ բարձր ցուցանիշներ արձանագրեց:

44-օրյա պատերազմի ժամանակ նա Արցախ գործուղեց ոստիկանության ծառայողների, որոնցից շատերը անկազմակերպվածության պատճառով հայտնվեցին Շուշիի մշակույթի կենտրոնում ու զոհվեցին առանց անգամ ռազմական գործողություններին մասնակցելու: Մյուս մասը՝ ոստիկանական հանդերձանքով, Շուշիի մատույցներում ընկավ թշնամու ծուղակը. ապաշնորհ կառավարման արդյունքում եղան տասնյակ զոհեր:

2020 թ. նոյեմբերի 9-ին ոստիկանության պետ Ղազարյանը կառավարության շենք մտած ժողովրդի «շրջափակման» մեջ հայտնվելով`ուրացավ, որ երկրի ղեկավարն իր ընկերն է (տեսագրություններ կան), այնինչ` նրան գավառական միլիցիոներից նախարար դարձրած Փաշինյանն անգամ նրան պաշտոնանկ անելուց չուրացավ և ի լուր աշխարհի հայտարարեց, որ 37 տարվա ընկերներ են:

Միայն Վահե Ղազարյանը կարող էր հրահանգել ենթականերին «Եռաբլուր»-ում բռնություն կիրառել զոհված զինծառայողների ծնողների նկատմամբ:
Ղազարյան Վահեի պաշտոնավարման օրոք ծանր հանցագործությունների թիվը կտրուկ ավելացավ, փոխարենը՝ նվազեց դրանց բացահայտման ցուցանիշը: Վերջին տարիներին կտրուկ ավելացավ թմրանյութերի շրջանառությունը Հայաստանում, ինչի մասին բարձրաձայնում են անգամ իշխանության ներկայացուցիչները:
Վահե Ղազարյանը միակն է այս հզոր կառույցի ղեկավարներից, որ ընթերցած մեկ նախադասության մեջ առնվազն չորս սխալ էր թույլ տալիս, որ լրագրողների հարցերից խուսափելու համար ճողոպրելիս` քիչ էր մնում ձորակն ընկներ «Եռաբլուր»-ում:

ՆԳ համակարգում ու նաև համակարգի վետերանների շրջանում նրա մասին ասում են՝ եկավ ու քանդեց համակարգը:

Պարեկային ծառայության ներդրման բազմամիլիոնանոց ծրագիրը թերևս միայն նրա նմանը կարող էր ձախողել, չնայած այն բանին, որ պետությունն ու արտաքին դոնորները ոչինչ չեն խնայել այն կյանքի կոչելու համար:

Ըստ մամուլի հրապարակումների` նրան են վերագրվում մայրաքաղաքում «ձեռք բերված» բազմաթիվ բնակարաններ էլիտար նորակառույցներում:

Ռուսաստանյան աղբյուրներն էլ պնդում են, թե ՆԳ նախկին նախարարն անշարժ գույքեր է ձեռք բերել նաև Հայաստանից դուրս: Դրանց առավել մանրամասն կանդրադառնանք առաջիկայում:

Ժամանակն ու պատկան մարմինները դեռ գնահատական կտան այդ չորսամյա խայտառակ պաշտոնավարմանը, բայց մինչ այդ, նա դեռ պիտի կարողանա քայլել հայրենի Իջևանում ու առավել ևս՝ մայրաքաղաքի փողոցներում: Պիտի կարողանա նայել իր հարյուրավոր ծառայակից ընկերների աչքերին: