Կոստանյանը շեշտել է ցեղասպանությունների կանխարգելման հարցում քաղաքական կամքի կարևորությունը

Դեկտեմբերի 13-ին «Ցեղասպանության և այլ զանգվածային ոճրագործությունների վաղ նախազգուշացման և վաղ  արձագանքման միջազգային մեխանիզմների արդյունավետության ամրապնդում»  խորագրով  Ընդդեմ ցեղասպանության հանցագործության 5-րդ Գլոբալ ֆորումի ավարտին ՀՀ ԱԳ նախարարի տեղակալ Վահան Կոստանյանը հանդես է եկել եզրափակիչ խոսքով։ Այս մասին հայտնում են ՀՀ ԱԳՆ-ից։

ՀՀ ԱԳ նախարարի տեղակալը իր երախտագիտությունն է հայտնել բոլոր զեկուցողներին հետաքրքիր և բովանդակային քննարկումների համար: Անդրադառնալով թեմատիկ քննարկումներին՝ Վահան Կոստանյանն ընդգծել է ցեղասպանության կանխարգելման օրակարգի առաջմղման գործում միանման քաղաքականություն որդեգրած փոքր պետությունների առաջնորդության կարևորությունը:

Վահան Կոստանյանը նշել է, որ, չնայած բոլոր մարտահրավերներին, նախադեպերին և հաջողված պատմությունների սակավությանը, անհրաժեշտ է ապահովել այս ուղղությամբ գործադրվող ջանքերի շարունակականությունը՝ վերահաստատելով Հայաստանի պատրաստակամությունը համագործակցել բոլոր միջազգային գործընկերների հետ՝ ցեղասպանությունների կանխարգելման օրակարգն առաջ մղելու նպատակով:

ՀՀ ԱԳ նախարարի տեղակալը շեշտել է ցեղասպանությունների կանխարգելման հարցում ազգային, տարածաշրջանային և միջազգային մակարդակներում քաղաքական կամքի կարևորությունը:

Ամփոփելով՝ Վահան Կոստանյանն իր խոսքում նշել է.

«Ինչպես նշվեց քննարկումներից մեկի ընթացքում՝ մենք ենք միջազգային հանրությունը և մենք պետք է ապահովենք միջազգային իրավունքի կիրառումը»: