Վրաստանում նախագահական ընտրություններ են

Վրաստանի նախագահական ընտրությունները տեղի կունենան շաբաթ օրը երկրի խորհրդարանում։ Այն կլինի առաջին անուղղակի ընտրությունները, երբ պետության ղեկավարի օգտին կքվեարկեն ընտրական կոլեգիան, այլ ոչ թե Վրաստանի քաղաքացիները։

Վրաստանի վեցերորդ նախագահի պաշտոնի միակ հավակնորդը Միխեիլ Կավելաշվիլին է։ Նախկին պատգամավոր, նախկին ֆուտբոլիստի թեկնածությունն առաջադրել է իշխող «Վրացական երազանք-Ժողովրդավարական Վրաստան» կուսակցությունը։ Ընդդիմությունը չճանաչեց հոկտեմբերի 26-ին կայացած խորհրդարանական ընտրությունների արդյունքները, բոյկոտեց օրենսդիր մարմնի նիստերը և թեկնածուներ չառաջադրեց։ Ընդդիմադիր պատգամավորները չեն ծրագրում մասնակցել քվեարկությանը։

Ընտրական կոլեգիան բաղկացած է 300 անդամից. դրանք են Վրաստանի խորհրդարանի 150 պատգամավոր, Աջարիայի Գերագույն խորհրդի 21 պատգամավոր, Աբխազիայի Գերագույն խորհրդի 20 ներկայացուցիչներ և երկրի տարբեր շրջանների շրջանային խորհուրդների և քաղաքային իշխանությունների 109 պատգամավորներ։ ՏԱՍՍ-ի փոխանցմամբ, քվեարկությունը տեղի կունենա Վրաստանի խորհրդարանի շենքում, այն կանցկացնի հանրապետության Կենտրոնական ընտրական հանձնաժողովը։ 2018 թվականին ուժի մեջ մտած սահմանադրության փոփոխություններից հետո Վրաստանում նախագահական ընտրություններն այլևս ուղղակի չեն անցկացվում։

Որպեսզի ընտրությունները կայացած համարվեն, դրանց պետք է մասնակցի խորհրդի անդամների կեսից ավելին։ Առաջին փուլում թեկնածու ընտրելու համար անհրաժեշտ է ընտրական ձայների առնվազն 2/3-ը, այսինքն՝ 200-ը, եթե թեկնածուն 200 ձայն չհավաքի, ապա նույն օրը տեղի կունենա երկրորդ փուլ, և նրան ընտրելու համար բավարար կլինի ձայների պարզ մեծամասնությունը։ Կոլեգիումին մասնակցող ավելի քան 150 պատգամավորներ ներկայացնում են «Վրացական երազանքը», որը փաստացի երաշխավորում է Կավելաշվիլիի ընտրությունը։
 

Նախորդ օրն ընդդիմության կազմակերպած ցույցն ավարտվել էր առանց արտակարգ միջադեպերի։