Օպերայի բակում գտնվող Ալեքսանդր Սպենդիարյանի գերեզմանոցի տարածքը շատ հաճախ ծածկվում է աղբակույտով (լուսանկարներ)

Օպերայի բակը Երևանի ամենագեղեցիկ ու մարդկանց ամենասիրելի վայրերից մեկն է։ Այդ տարածքը գրեթե միշտ մարդաշատ է, որտեղ զբոսնում են օտարերկրացի զբոսաշրջիկները, երևանցիներն ու Երևանը բացահայտողները։

Քչերն են նկատել, որ Օպերային կից գտնվում է հայ մեծ կոմպոզիտոր Ալեքսանդր Սպենդիարյանի գերեզմանոցը։ Գերեզմանը գտնվում է Օպերայի հարակից սրճարանների թիկունքում ու շատ ժամանակ այդ տարածքը վերածվում է աղբակույտի, քանի որ տարածքում քչերը գիտեն, որ այդ վայրում է հանգչում հայ մեծ կոմպոզիտորի աճյունը։ Մինչ օրս երաժիշտներն ու մտավորականները շարունակում են քննարկել, թե արդյո՞ք պետք է Սպենդիարյանի աճյունը մնա այդ տեղում, թե պետք է վերահուղարկավորվի Կոմիտասի անվան պանթեոնում։

Երբ 1928 թվականի մայիսի 7-ին մահացավ Ալեքսանդր Սպենդիարյանը, Ժողկոմխորhի հրամանով կազմվեց կառավարական հանձնաժողով, որը բաղկացած էր 18 անդամից։ Կառավարական այդ հանձնաժողովի մեջ էին Ավետիք Իսահակյանը, Մարտիրոս Սարյանը, Ալեքսանդր Թամանյանը և այլք, ու այդ կառավարական հանձնաժողովն էլ որոշում ընդունեց, որ կոմպոզիտորը պետք է հուղարկավորվի հենց Օպերայի բակում, որն այդ ժամանակ դեռ չէր կառուցվել: Հուշագիրներից ոմանք էլ պատմում էին, որ Ալեքսանդր Թամանյանն ամեն անգամ կարգի էր բերում իր ընկերոջ՝ կոմպոզիտորի գերեզմանն ու ծաղիկներ տնկում։

Այդ տարիներին Օպերայի տարածքը Երևանի գլխավոր մշակութային վայրերից մեկն էր , սակայն հիմա պատկերը մի փոքր այլ է։ Օպերայի տարածքում ժամանցային վայրեր են, սրճարաններ։ Մարդիկ գալիս են այդտեղ ոչ թե մշակութային կյանքով ապրելու, այլ զվարճանալու ու տրամաբանորեն մի շարք մտավորականների մտահոգությունը տրամաբանված է։

NEWSPRESS.am-ի հետ զրույցում տարածքում բնակվող 68-ամյա Արմեն Սիմոնյանն ընդգծեց, որ մի քանի անգամ ինքն անձամբ է մոտեցել գերեզմանին ու տեսել, թե ինչ աղբակույտ է հավաքված այդ տարածքում։

«Նույնիսկ Օպերայի տարածքի բնակիչները չգիտեն, որ կոմպոզիտորն էստեղ է թաղված։ Գիտեն միայն տարեցները, որոնցից քչերն են կենդանի մնացել։ Մեր ջահելներն էլ չգիտեն նույնիսկ, թե ով է եղել Սպենդիարյանը, ինչ մնաց իմանան, թե որտեղ է թաղված։ Ես կուզենայի, որ կոմպոզիտորին տեղափոխեն Կոմիտասի անվան պանթեոն, քանի որ Օպերայի տարածքում հիմա խայտառակություն է»։

Ա․ Սիմոնյանն ընդգծեց, որ ժամանակին Կոնսերվատորիայի տարեց դասախոսներից մեկը միշտ գալիս էր ու ծաղիկներ դնում մեծ կոմպոզիտորի շիրիմին, սակայն վերջին շրջանում չի երևում նա։

NEWSPRESS.am Culture