«Էս եկեղեցու բակում գերեզմաններ կան, մեր հերոսներն են թաղված, ո՞նց են քանդում»․ քաղաքացին հացադուլ է հայտարարել (ֆոտո, վիդեո)

Երեկ՝ մայիսի 16-ին, Սյունիքի մարզի Կուրիս (նախկին Կուրավանք) գյուղի բնակիչ 31-ամյա Բորիս Անդրեասյանը հացադուլ է հայտարարել։

Նա պահանջում է հեռացնել Ագարակի պղինձամոլիբդենային հանքարդյունաբերությունն իրականացնող ռուսական ընկերությանը տարածքից, քանի որ վերջիններիս ախորժակը բացվել է, և թալանում են ամբողջ ընդերքը։

«Ես չեմ ասում, որ պետք չէ հանքարդյունաբերություն իրականացնեն, բայց ամեն ինչին չափ ու սահման կա։ Ահագաբար պայթեցնում են հանքն ու քանդում, թալանում են։ Ես ուզում եմ էդ հանքից ոչ թե ռուսներն օգտվեն, այլ մեր հայերը։ Ուզում եմ նաև, որ էդ ստացած շահույթի գոնե մի մասը ներդնեն մեր համայնքի բարելավման համար, քանի որ պայթյունից բոլորիս տները վթարային են դարձել»,-NEWSPRESS.am-ի հետ զրույցում ասում է Բորիս Անդրեասյանը։

Հարկ է նկատել, որ հաճախակի կրկնվող պայթյուններից ճաքել են ոչ միայն տների պատերն ու վնասվել տանիքները, այլև քանդման եզրին է տարածքում գտնվող Սուրբ Ամենափրկիչ եկեղեցին, որի բակում էլ հենց 2 անչափահաս երեխաների հայրը՝ Բորիսը, հացադուլ է հայտարարել։

Մի քանի տարի առաջ արդյունաբերությունն իրականացնող «Ագարակի պղնձամոլիբդենային կոմբինատ» ՓԲԸ-ն հայտարարել էր, որ նախատեսում է ձեռնարկել 17-րդ դարի Սուրբ Ամենափրկիչ եկեղեցու տեղափոխման աշխատանքները։ Այժմ սկսվել են եկեղեցու քանդման աշխատանքները։ Եկեղեցու կողքի սարալանջն արդեն ամբողջությամբ քանդված է։

«Էս եկեղեցու բակում գերեզմաններ կան, մեր հերոսներն են թաղված, ո՞նց են քանդում, ո՞նց կարող են քանդել»,- նեղսրտած ասում է մեր զրուցակիցը։

Բորիս Անդրեասյանը նշում է, որ ունի բարձրագույն կրթություն, բայց աշխատանք չունի, ու հիմա դարձյալ ոչինչ չի ակնկալում, միայն թե փրկի եկեղեցին ու ռուսներից ազատի հանքը, որը նրանց են հանձնել նախկին նախագահ Սերժ Սարգսյանն ու նրա հանրապետական ընկերները։

Գիտակցելով հարցի լրջությունը՝ հացադուլ եմ հայտարարում