Վարդենիսի հիվանդանոցը կփակվի․ ծախսերը կկրճատվեն՝ գործազրկության հաշվին․ նոր նախարարները կշարունակեն նախորդների գործը

«Վարդենիսի հիվանդանոց» ՓԲԸ-ն լուծարման եզրին է։ Դեռ նախորդ կառավարության ժամանակ կայացվել է որոշում, ըստ որի՝ Վարդենիսի հիվանդանոցը կլուծարվի և կմիանա զինվորական հոսպիտալին։ Այս երկու բժշկական հաստատությունները գործում են մեկ տարածքում։

Հիվանդանոցը փակելու հանգամանքը պատճառաբանվում է նրանով, որ այն շահութաբեր չէ, աշխատում է վնասներով և բավականին պարտքեր ունի։ Այդ իսկ պատճառով հիվանդանոցում չեն կատարվել նաև շինարարական աշխատանքներ արդեն երկար տարիներ, և այսօր շինությունը նաև բարեկարգման կարիք ունի, ինչը ցածր շահութաբերության պարագայում անիրատեսական է։

Այսօր՝ հունիսի 22-ին, Գեղարքունիքի մարզպետարանի առողջապահության վարչության պետի ուղեկցությամբ հիվանդանոց է այցելել Պաշտպանության նորանշանակ նախարար Դավիթ Տոնոյանը։ Վերջիններս հորդորել են աշխատողներին, որ կրճատումների հետ կապված մտավախություն չունենան։

Վարդենիսի հիվանդանոցում այսօր կա 90 աշխատող և այն ունի 60 մահճակալի հնարավորություն։ Մոտ 10-15 տարի առաջ հիվանդանոցի բոլոր մահճակալները մշտապես զբաղված էին լինում, այժմ կապված արտագաղթի և մի շարք այլ խնդիրների հետ, հիվանդներ քիչ են լինում։ Իհարկե, լինում են դեպքեր, երբ նույնիսկ գիշերային հերթափոխության անհրաժեշտություն է լինում, սակայն դա այնքան էլ հաճախ չի լինում։

Բայց այստեղ արդեն խնդիրը սա չէ․․․ 

Որքան էլ պատկան մարմինները վստահեցնում են, թե կրճատումներ չեն լինի, այնուամենայնիվ, NEWSPRESS.am-ի տեղեկություններով՝ աշխատանքից ազատվողներ կլինեն։ Որոշ տեղեկությունների համաձայն էլ՝ խոսք կա, որ աշխատանքից կազատվեն հիվանդանոցի գրեթե բոլոր բուժաշխատողները։

Սա իր հերթին․․․

Մյուս կողմից էլ՝ Պաշտպանության նախարարը թեև վստահեցրել է, որ հիվանդանոցը հոսպիտալին միացվելուց հետո կատարվելու է շենքի բարեկարգում, սակայն սա ևս քիչ հավանական է թվում։

Մեզ հետ զրույցում, աշխատողներից մեկը խնդրի շուրջ հայտնեց իր մտահոգությունը․ «Հիշո՞ւմ եք, թե ոնց էր Պաշտպանության նախարարությունը զինվորների համար 1000 դրամ հավաքում․ հիմա, եթե նախարարությունն ընկած փող է մուրում, էդ ինչպե՞ս, ի՞նչ միջոցներով ա վերանորոգելու շենքը»,- հարցրեց նա՝ նշելով, որ եթե կարող էր վերանորոգել, ապա պետք է մինչ այդ աներ ու հիմա բուժհիմնարկների միացման հիմնական նպատակը, ըստ մեր զրուցակցի, աշխատողներից ու ավելորդ ծախսերից ազատվելն է։ Այլ կերպ ասած՝ ծախսերը կկրճատեն՝ գործազրկության հաշվին։

Թե այս վարկածներից որն է ավելի արժանահավատ, փորձեցինք պարզել Առողջապահության նախարարությունից։ Մեզ խոստացան պատասխանել անմիջապես, երբ ձեռքի տակ կլինեն հիվանդանոցի փակման հետ կապված բոլոր հիմնավորումները։ 

NEWSPRESS.am-ն խնդրի շուրջ նախարարության պարզաբանումը կհրապարակի, երբ այն կստանա։ 

Հ․Գ․ Հիվանդանոցի՝ հոսպիտալին միացնելու նախագիծն առաջարկել է Պաշտպանության նախկին նախարար Վիգեն Սարգսյանը, որն ընդունվել է Առողջապահության նախկին նախարար Լևոն Ալթունյանի կողմից։ Ասել է թե՝ նոր նախարարներ Տոնոյանն ու Թորոսյանը շարունակում են նախկին կառավարության մարտավարությունը։