Մի օր պետք է մեր կարգավիճակում ապրեն, որ հասկանան․ մանկատան անօթևան նախկին սաները հացադուլ են անում (տեսանյութ)

«Զատիկ» մանկատան նախկին սաները սեպտեմբերի 12-ի երեկոյան անժամկետ հացադուլ են սկսել կառավարության շենքի դիմաց: 

6 ամիս շարունակ տարբեր դռներ թակելուց և անտեսված մնալուց հետո, մանկատան նախկին սաները որոշել են դիմել այս տարբերակին:

18 տարին լրանալուց հետո, նրանք պետք է արդեն պետության կողմից ապահովված լինեին բնակարաններով, սակայն արդեն մի քանի տարի է՝ անօթևան են։

NEWSPRESS.am-ի հետ զրույցում սաները նկատեցին, որ իրենցից մի քանիսը վարձով բնակարան են ձեռք բերել, սակայն այնքան պարտքեր են կուտակվել, որ այլևս ի վիճակի չեն վճարել։

Աղջիկներից մեկը նկատեց, որ տուն ստացողներ եղել են, սակայն որոշները մնացել են անօթևան։ Նրանցից  այսօր բողոքի ակցիային մասնակցում են ընդամենը 7-ը, ու թեև նրանց թիվն անցնում է 100-ից, սակայն մեր զրուցակիցը պնդեց, որ վերջիններս կառավարության շենքի մոտ չեն մի պարզ պատճառով՝ ունեն աշխատանք և չեն ցանկանում, որ աշխատավայրում իմանան իրենց խնդրի մասին։

«Նամակ ենք գրել նույնիսկ վարչապետին, տեսել ենք իրեն, ասել ենք խնդրի մասին: Պատասխանել է, որ իրենք գիտեն, մտածում են այդ ուղղությամբ, բայց ինչքա՞ն պետք է մտածեն, մինչև մի 13 տարի էլ դրսում մնա՞նք»,- ասաց մեր զրուցակիցը։

Ինչ վերաբերում է հացադուլ անող տղաներին, ապա մեր զրուցակիցը նկատում է՝ այս տղաների համար իրականում միևնույնն է՝ այս գիշեր կքնեն այստեղ, թե մեկ այլ փողոցում, նրանք տուն չունեն։

Մանրամասները՝ մեր տեսանյութում