Գյուղնախարարությունը կաջակցի միայն որոշակի շեմից բարձր կորուստ ունեցող գյուղացիներին, իսկ այդ շեմը դեռ չի որոշել
NEWSPRESS.am-ն արդեն անդրադարձել է Լոռու և Արմավիրի մարզերում տեղացած կարկուտի հասցրած վնասներին։ Վնասվել էին կենդանիներ, տներ, մեքենաներ, ցանքատարածություններ, այգիներ ու անգամ մարդիկ։
Գյուղնախարարությունը կարկուտից տուժած բնակիչներին որոշակի դրամական օժանդակություն կհատկացնի, սակայն վնասված կենդանիների, մեքենաների, տանիքների ու լուսամուտների համար պատասխանատվություն չի կրում։
Գյուղնախարար Արթուր Խաչատրյանը NEWSPRESS.am-ի հետ զրույցում նկատեց, որ հակակարկտային դաշտն ԱԻՆ-ի ենթակայության տակ է, և իրենց մեղքը չէ, որ ԱԻՆ-ը չի կարողացել ծածկույթ ապահովել: Իրենց գործը հիմա վնասի չափը գնահատելն է, որից հետո կլինի դրամական օժանդակություն։
«Ինքներդ եք հասկանում՝ մենք ի՞նչ մեղք ունեք, որ ինչ-որ մեկն իր հավաբունը կամ գոմը ամուր չի կառուցած լինում։ Մենք միայն ցանքատարածքների ու այգիների վնասը պետք է գնահատենք»,- ասում է Արթուր Խաչատրյանը։
Նա բացատրում է, որ մարզային իշխանությունները գնահատում են վնասի չափը, իսկ նախարարությունը՝ որոշում, թե ինչ առաջնահերթությամբ և երբ հատկացնի օժանդակությունը։ Նախարարը, նշելով, թե ինչ կարգով են որոշում վնասի չափը, խոստանում է, որ կփորձեն հնարավորինս շուտ օժանդակել։
«Հիմա հաշվարկում ենք, որ տեսնենք՝ որքան է վնասը ու որքան գումար է կազմում։ Նախորդ տարվա համեմատ՝ մի քիչ կփորձենք ավելի շատ աջակցել»։
Ամեն դեպքում՝ նախարարությունը կանխիկ գումար է տալու գյուղացուն՝ ջրի, հողի կամ այլ վճարումներ կատարելու համար։ Միևնույն ժամանակ, Արթուր Խաչատրյանը նկատում է, որ չեն կարող ամբողջությամբ վճարել գյուղացու կրած վնասի համար։
«Ասենք՝ 100 հազար դրամի վնաս է կրել, այդքան չենք կարող աջակցել, տալիս ենք x դրամ՝ բայց կանխիկ»,- ասում է նախարարը։
Արթուր Խաչատրյանը նկատում է նաև, որ դեռ օգոստոսի սկզբին տեղացած կարկուտի վնասները նոր էին ներկայացրել կառավարությանը, երբ հաջորդ օրը կրկին կարկուտ տեղաց մեկ այլ մարզում։ Հիմա նախարարությունում սպասում են, որ «կարկուտի սեզոնը ավարտվի», որպեսզի մի որոշմամբ գումար հատկացնեն տուժածներին՝ ըստ առաջնահերթության։
«Պետք է նայել ընդհանուր վնասի չափը, որ կարողանանք հատկացումները ճիշտ իրականացնել։ Մենք նայում ենք, օրինակ, 10 մարզում որքան է վնասի չափը, հետո որոշում ենք կայացնում, թե ում ենք գումար հատկացնում։ Ենթադրենք, եթե ինչ-որ մեկի բերքի 20 տոկոսն է կորել, իհարկե՛ իրենց չենք աջակցում, նայում ենք որոշակի շեմից վերև, թե ո՞վ է էական կորուստ ունեցել»,- ասում է նախարարը, սակայն թե որն է այդ շեմը, նախարարությունում դեռ չեն որոշել։ Այդ շեմը որոշելիս պետք է հաշվի առնվեն նաև կառավարության ֆինանսական «կարողությունները»։
Նախարարությունում չեն որոշել նաև, թե կոնկրետ որքան կկազմի այդ գումարը․
«Դա կոլեկտիվ որոշման արդյունք է լինելու, ճիշտ չի լինի՝ ասեմ»,- ասում է նախարարը, ում խոսքով՝ բյուջեում հատուկ այդ նպատակով գումար չի լինում նախատեսված, այլ հատկացումները լինում են պահուստային ֆոնդից։
Ամեն դեպքում, դեռ սպասում են մինչև կարկուտների սեզոնն ավարտվի, որպեսզի հաշվարկ սկսեն։ Նախարարը նկատում է, որ կարկուտին հաջորդող տասնօրյակում դեռ վտանգը պահպանվում է։
Դիտարկմանը, թե այդ վտանգը կարող է պահպանվել մինչև դեկտեմբեր, նախարարն արձագանքում է՝ հնարավոր է կարկուտը դեկտեմբերին էլ գա, բայց այդ ժամանակ ո՛չ ծառին միրգ կա, ո՛չ դաշտում խոտ, ու այն վնաս չի կարող հասցնել գյուղացուն։
Մի խոսքով՝ գյուխնախարարը խոստանում է գյուղացու կրած վնասները ներկայացնել կառավարության նիստին: Թե կոնկրետ որ՝ դժվարանում է ասել, մինչև դեկտեմբեր հաստատ կներկայացնի․ հույս ունի՝ ավելի շուտ։
