«Որ վարչապետը գալիս է՝ պետք է ձգվեք. բոլորին հեռացնեք աշխատանքից ու զեկուցեք ինձ». Փաշինյանը մաքսատանն է (տեսանյութ)

ՀՀ վարչապետ Նիկոլ Փաշինյանն այցելել է Նորագավիթի մաքսակետ: Նրան այնտեղ, աշխատանքի հետ կապված, մի քանի հարցեր հետաքրքրեցին, որոնց մասնագիտական պատասխաններ տվեցին, սակայն Փաշինյանն այնքան էլ չհասկացավ աշխատանքի կառուցվածքը և նա որոշեց շարժվել առաջ:

Այն, ինչ առաջինը նկատեց նա այնտեղ՝ ծխախոտի մնացորդներն էին ու ընդհանուր կեղտոտ վիճակը: Փաշինյանը դժգոհեց մաքրությունից:

«Մանավանդ իմ այցի օրն ինչո՞ւ է այստեղ «բիչոկ» գցած գետնին: 25 տարվա բիչոկ է երևի, սա մեր երկրի իմիջի հարցն է: Կամ էն պատը, էն ի՞նչ վիճակ ա»,-ասաց նա ու մոտեցավ պատին:

Փաշինյանը ձեռքով սրբեց պատն ու նկատեց, որ այն երկար ժամանակ չի մաքրվել. «Սա խայտառակ կեղտոտ տարածք է: Սա վերաբերմունք է մեր դրոշի ու զինանշանի նկատմամբ»,- ասաց Փաշինյանը:

ՊԵԿ ղեկավար Դավիթ Անանյանը փորձեց ինչ-որ բան ասել, սակայն Փաշինյանը ընդհատեց նրան. «Չէ, Դավիթ ջան. խայտառակ կեղտոտ ա: Հիմա իրենց պարգևավճարներից կպակասեցնեք ու այստեղ կբերեք կարգին վիճակի»:

Մաքսատան սենյակներից մեկը մտնելիս՝ Փաշինյանը դիտողություն արեց դռան մոտ կանգնած աշխատողին:

«Որ վարչապետը մոտենում է, պետք է ձգված կանգնել, այ սենց արած (ուսերը կախ գցեց- հեղ.) չեն կանգնում»,-ասաց Փաշինյանն ու մտավ ներս:

Սենյակում էլ եռագույն դրոշը գետնին ընկած տեսավ ու նորից բարկացավ. «Աշխատավարձդ կծախսես, դրոշը կդնես գլխավերևում, հետո դիմումդ կգրես ու կգնաս տուն, լսեցի՞ր: Ով աշխատել է այդ սենյակում, բոլորը հեռացվեն աշխատանքից, կզեկուցեք անձամբ ինձ: Դրանց կանգնելու ձևը, հագուկապը, ոնց որ քուչում լինեն: Լավ ա չեն պպզել»,-ասաց Փաշինյանը:

Մանրամասները՝ տեսանյութում