Ի՞նչ ենք մենք թաքցնում հանրությունից, ի՞նչ կարող ենք թաքցնել և ինչո՞ւ թաքցնենք. Փաշինյանը՝ Վարդապետյանին
ՀՀ Գլխավոր դատախազը ՀՀ կառավարության նիստին մի շարք մանրամասներ ներկայացրեց Գեղարքունիքի մարզի զորամասերից մեկում բռնկված հրդեհից զոհված զինվորների գործի նախաքննությունից՝ նշելով, որ հանրությունը պարբերաբար կտեղեկացվի գործից, որպեսզի խուսափեն տարբեր ասեկոսեներից, բամբասանքներից:
Արձագանքելով՝ Նիկոլ Փաշինյանն ասաց, որ հանրությանը մենք միշտ ասում ենք, որ սրանք նախնական վարկածներ են:
«Ի՞նչ ենք մենք թաքցնում հանրությունից, ի՞նչ կարող ենք թաքցնել և ինչո՞ւ թաքցնենք: Ի՞նչ է պարզել նախաքննությունը»,- հարցրեց Փաշինյանը Վարդապետյանին:
Վարդապետյանը, պատասխանելով Փաշինյանի հարցադրմանը, նշեց. «Ոչ մի բան մենք չենք կարող թաքցնել և մտադրություն էլ չունենք թաքցնելու: Անձանց անունների չբացահայտելն ընդամենը նպատակ ունի ապահովելու այդ անձանց փախուստի բացառումը»:
Փաշինյանն, ընդհատելով Վարդապետյանին, ասաց, որ ինքը այլ բան նկատի ունի, այն է՝ որոշ մարդկանց մեկնաբանություններ կարդում ես և այնպիսի տպավորություն է, որ այդ հրդեհը ոչ թե իր նկարագրած բենզինի 5 լիտրանոց տարայի օգտագործման պատճառով է բռնկվել, այլ՝ ընդհուպ ինչ-որ այլ բան է տեղի ունեցել:
«Ձեր կողմից հրապարակված վարկածն այս պահին կենսունակ վարկած է, իսկ մյուս բոլոր վարկածները ստուգվում են և բացառման կանոնով ստուգումներն իրականացվում են: Սակայն հիմնական վարկածը, որի շուրջ քննությունն այս պահին իրականացվում է և կարծես թե այս պահին մենք ունենք ապացույցերի բազա, որով մեղադրանք ենք առաջադրում, Կառավարության նիստի ժամանակ հրապարակված վարկածն է: Բայց կրկնում եմ՝ քանի որ հասարակությունն անընդհատ այդ հարցը բարձրացնում է, ուստի բոլորի հետ կապված քննությունն իրականացվում է, որպեսզի հետո հանկարծ չհնչեն կասկածներ, որ մենք որևէ վարկած չստուգեցինք»,- ասաց Վարդապետյանը:
Փաշինյանը հավելեց նաև, որ, եթե որևէ բան Կառավարության նիստում հնչում է, ապա որևէ մեկն այդ հնչածով սահմանափակված կամ կաշկանդված չէ, որովհետև այդ պահին հնչել է այն տեղեկությունը, որն այդ պահին ունեցել են:
«Հանրության հետ դա կիսել ենք, կիսում ենք և կկիսենք: Նկատի ունեմ, որ եթե պարզվի, որ Կառավարության նիստում հնչածի 180 աստիճան հակառակ բան է եղել, ապա մենք դրանով կաշկանդված չենք: Մենք հանրության հետ հաղորդակցության մեջ ենք»,- իր խոսքը եզրափակելով՝ ասաց Փաշինյանը: