Մենք չէինք ցանկանա մեկնաբանել դա․ Պեսկովը՝ Կիրանցում պայմանագրային զինծառայողների՝ ակցիային միանալու տեղեկությունների մասին
ՌԴ նախագահի մամուլի քարտուղար Դմիտրի Պեսկովը հայտարարել է, որ Ռուսաստանը հանդես է գալիս Երևանի և Բաքվի միջև շփումների շարունակման օգտին։ Այս մասին գրում է ՌԻԱ Նովոստին։
Ավելի վաղ «Տավուշը հանուն հայրենիքի» հասարակական նախաձեռնությունը հայտնել էր, որ Տավուշի մարզի հայկական սահմանամերձ Կիրանց գյուղում պայմանագրային զինծառայողներ են միացել բողոքի ակցիային, որի մասնակիցները պահանջում են դադարեցնել Ադրբեջանի հետ սահմանի սահմանազատման և մի շարք սահմանամերձ տարածքները ադրբեջանական կողմին փոխանցելու գործընթացը։
Հայաստանի պաշտպանության նախարարությունը հայտարարել է, որ ռազմական ոստիկանությունն այս կապակցությամբ ձեռնարկում է անհրաժեշտ միջոցներ։
«Մենք չէինք ցանկանա մեկնաբանել դա: Դուք գիտեք, որ մենք հանդես ենք գալիս Բաքվի և Երևանի միջև շփումների շարունակման օգտին: Մենք կարծում ենք, որ դրանք անհրաժեշտ են ընդհանուր լարվածության և օրակարգային բոլոր վիճահարույց հարցերի վերջնական կարգավորման համար, որպեսզի հնարավորիս շուտ ստորագրվի խաղաղության պայմանագիրը»,- ասել է Պեսկովը՝ լրագրողների խնդրանքով անդրադառնալով հայկական սահմանամերձ Կիրանց գյուղում Ադրբեջանի հետ սահմանի սահմանազատման դեմ ակցիային պայմանագրային զինծառայողների միանալու մասին տեղեկությունը։